Letër publike partive politike shqiptare dhe deputetëve të Kosovës për Gjykatën Speciale

Opinione

Letër publike partive politike shqiptare dhe deputetëve të Kosovës për Gjykatën Speciale

Nga: Zana Bytyqi Më: 13 nëntor 2016 Në ora: 16:26
Foto ilustrim

 Është koha e fundit që të përmirësoni gabimin e bërë të vitit të kaluar kur e miratuat ligjin selektiv dhe të padrejtë për Gjykatën Speciale për Kosovën e kur injoruat plotësisht krimet e Serbisë ndaj më të dashurve tanë.

Unë Zana Bytyqi, po ju shkruaj në emër të familjarëve të 86 viktimave – vëllezërve, bashkëshortëve e prindërve tanë nga komuna e Klinës - të vrarë e të zhdukur me 4 Prill 1999 në fshatin Kralan, komuna e Gjakovës - nga ushtria dhe policia e Serbisë.

U bënë më shumë se 17 vite që po presim nga përfaqësuesit e institucioneve të drejtësisë vendore dhe ndërkombëtare që të dërgojnë në gjykim vrasësit serbë të cilët ende sillen të lirë në territorin e Serbisë. Por, kot, kjo nuk po ndodhë.

Ligji për Gjykatën Speciale për Kosovën është miratuar nga parlamenti i Kosovës, pra nga deputetët e Kosovës së pavarur.

Tash, ju duhet që të plotësoni këtë ligj dhe të kërkoni me votën tuaj që krimet e ushtrisë dhe policisë kriminale të Serbisë gjatë viteve 1998-1999 të ndëshkohen, pikërisht në këtë gjykatë speciale për Kosovën né Hagë.

Votat e marra nga ne që nga fundi i kësaj lufte të tmerrshme, ju krerë të partive tona dhe deputetë të parlamentit të Kosovës së pavarur duhet t’i arsyetoni ato të paktën me plotësimin e këtij ligji selektiv dhe të padrejtë.

Aktakuzat e deritashme që i ka bërë EULEX bashkë me krye-prokurorinë e Kosovës për krimet e Serbisë në Kosovë, po shkojnë kot së koti, sepse Serbia nuk po i dorëzon në Kosovë të akuzuarit për gjykim, dhe nuk do t'i dorëzojë kurrë.

Ilustrimi më i mirë i kësaj qasjeje të gabuar të misionit të BE-së në Kosovë është rasti i Gjeneralit Momir Stojanovic dhe 16 të tjerëve për masakrën në Krushë të Madhe.

Ata janë paditur në fillim të vitit 2015. Stojanoviç është në kërkim nga Interpol dhe gjendet në Serbi, është parlamentar i SNS, partia e kryeministrit të Serbisë Aleksandar Vuçiçit.

Ju, parti politike shqiptare dhe deputetët tuaj e keni votuar në mënyrë të verbër vitin e kaluar ligjin për Gjykatën Speciale në Hagë për Kosovë, përkatësisht për krimet e pretenduara të pjesëtarëve të UÇK-së.

Kërkojmë nga ju pra, që këtë gabim ta përmirësoni duke e freskuar këtë ligj dhe që përmes plotësimit të tij të kërkoni që kjo gjykatë të merret edhe me krimet e Serbisë gjatë luftës 1998-1999 ndaj më të dashurve tanë.

Ju, deputetë të shumicës në pushtet dhe opozitës dhe askush tjetër mund ta plotësoni këtë ligj në mënyrë që gjykata e re në Hagë të padis kriminelët që po lëvizin lirshëm nëpër Serbi.

Eshtë e kotë që të akuzojmë ne të gjithë së bashku prokurorët e EULEX-it, kur ju deputetë të Kosovës nga shumica pushtetare ishit ata që e votuat këtë ligj gjysmak.

Ashtu si edhe partitë në pushtet (PDK e LDK) dhe deputetë të tyre, as ju parti opozitare (VV, AAK dhe Nisma) dhe deputetë të tyre nuk mund të pastroni duart nga kjo padrejtësi që po na bëhet. 

Edhe ju, ashtu si edhe kolegët tuaj nga PDK dhe LDK, pra të gjithë së bashku, mund të ndryshoni rrjedhat e kësaj gjykate duke propozuar dhe aprovuar plotësimin e këtij ligji në mënyrë që atje në Hagë të mund të dërgohen për gjykim kriminelët e Serbisë.

Prokurorët e EULEX-it dhe ata të Kosovës janë duke tentuar që të ngrehin padi në gjykatat në Kosovë ndaj përgjegjësve të ushtrisë dhe policisë së Serbisë për masakrën e Kralanit.

Por edhe nëse këto aktpadi bëhen ato do të jenë të kota sepse qeveria e Serbisë nuk do të dërgojë në Kosovë për gjykim njerëzit e saj, ashtu siç nuk po e dërgon Stojanoviçin dhe 16 të tjerët për masakrën në Krushë të Madhe.

Drejtësia për viktimat e Kralanit dhe ne familjarëve të tyre si dhe për mijëra viktimat e qindra masakrave të tjera nëpër tërë Kosovën është në duart tuaja, deputetë të Kosovës.

Plotësimi i ligjit për Gjykatën Speciale për Kosovë është në duart e tuaja : PDK, LDK, VV, AAK e NISME, e në duart e askujt tjetër.

Kosova është shtet i pavarur, apo jo? Ju deputetë të këtyre pesë partive jeni deputetë të parlamentit të Kosovës së pavaruar, apo jo ? Ligjet të cilat miratohen apo hedhen poshtë nga ju bëhen në mënyrë të pavarur ashtu siç është Kosova e jonë e përbashkët e pavarur apo jo ?

Ju jeni adresa dhe shpresa jonë e fundit që vrasësit serbë të më të dashurve tanë, të Kralanit dhe varrezave/masakrave të tjera masive nëpër Kosovë të dërgohen para drejtësitë, pra në Gjykatën Speciale në Hagë për Kosovën.

Askush, nuk ka të drejtë të na e marrë këtë drejtë neve. Askush nuk ka të drejtë që t’ju pengojë juve në realizimin e kësaj kërkese tonë të shenjtë.

Presim të dëshmoni votën e marrë nga ne, ne qytetarët e harruar të Kosovës. Na e ktheni dinjitetin e dërmuar plot 17 vite duke plotësuar këtë ligj të mbrapshtë për Gjykatën Speciale dhe bëjeni detyrën tuaj të shenjtë për të ndikuar në zbatimin e drejtësisë për më të dashurit tanë të vrarë e të masakruar nga ushtria dhe policia serbe.

Nëse ju, deputetë të Kosovës i keni harruar krimet e Serbisë dhe nuk qani më kokën për këto krime, ne familjarët e Kralanit dhe familjarët e mbi 12000 viktimave të tjera civile të luftës nuk i kemi harruar këto krime. 

Ne i jetojmë dhe i ndjejmë këto dhembje për çdo ditë plot 17 vite, dhe do t’i ndjejmë gjithherë.

Fjalën e keni ju, udhëheqës të PDK-së, LDK-së, VV-së, AAK-së dhe NISMA-s dhe ju deputetë të Kosovës së pavaruar.

Autorja është përfaqësuese nga Shoqata-OJQ “Familja dhe Shpresa”, Klinë.

Sot mund të lexoni Shfletoni kopertinat