Me formimin e qeverisë Haradinaj sikur menduam se u tejkalua çështja e numrave të koalicionit PANAL për formimin e institucioneve shtetërore. Hyrja e AKR-së në koalicion me PAN-in, në fillim u çmua si bekim por siç po shihet tani ky bekim po na del si mallkim.
Siç duket koalicioni PANAL i kishte bërë llogaritë gabimisht. Po del që ata më shumë kishin qenë të përkushtuar në plotësimin e ambicieve personale të marrjes së posteve shtetërore, pa menduar se vrapimi pas atyre posteve mund të dëmtoj numrin e votave të koalicionit në Kuvend. Lidhja e koalicionit të AKR-së me PAN-in nuk doli që të jetë bërë me pëlqim unanim të AKR-së siç u paraqit “para opinionit”.
Menjëherë pas këtij koalicioni, deputeti i AKR-së Korab Sejdiu braktisi AKR-në dhe koalicionin PANAL e zvogëloi për një votë. Gjithashtu, lëshimi i posteve të deputetëve vetëm e vetëm për të marrë poste qeveritarë mundësuan humbjet tjera të votave të AKR-së. Me largimin e deputetit Behgjet Pacolli dhe emërimit të tij në postin e zëvendës kryeministrit dhe ministrit të punëve të jashtme, AKR-ja humbi edhe një deputet ndërsa LDK-ja përfitoi nga ky rast duke e shtuar numrin e deputetëve edhe për një.
Sikur të mos mjaftonin këto zhvillime, dikush nga të mëdhenjtë e PANAL-it e futi në lojë KQZ-në , me porosi që deputetin Zafir Berisha ta de certifikoj nga kandidatura për kryetar komune. Qëllimi është që një kandidat serioz për Prizrenin siç është Zafir Berisha ta mënjanojnë nga gara sepse nëse do të fitonte garën do të dilnin të “bëmat e famshme “ të qeverisë Muja. Kjo lojë, koalicionit PANAL i ka kushtuar me humbjen edhe të një vote ( me të drejtë) të deputetit në Kuvend ngase deputeti Zafir Berisha ka deklaruar se “nuk do ta mbështes këtë koalicion”. Të gjitha këto vlime në kazanin politik të PANAL-it, tregojnë frymën dhe fytyrën e vërtet të këtij koalicioni mish mashi.
Qeveria që punon së koti
Tentimi që përmes mbledhjeve të qeverisë, të heshtët çështja e mungesës së numrave në Kuvend, ka si qëllim që para opinioni publik situatën e “ krizës së numrave” ta paraqesë si normale. Ky është një gabim tjetër finok i kësaj qeverie, e cila ka nisë t’i sjell probleme vetvetes. Koha më së miri dëshmoi se rëndësia e numrave në Kuvend nuk mund të anashkalohet kurrsesi. Këtë nuk deshi ta kupton ambicia dhe kokëfortësia e koalicionit PANAL. Tre muaj kohë na morën numrat dhe u bëmë gazi i botës. Mungesa e guximit për tu marrë me çështjen e numrave tregon edhe një fakt tjetër, të pa thënë deri më tani për koalicionin e brishtë. Ky koalicion, përtej të sotmes nuk di të parashikoj asnjë veprim politik. Si u bë që ky koalicion nga 63 deputet, tani të mbetet në 60 deputet.
Pse gjatë procesit të ndarjes së “kulaçit” nuk menduan se sa numra do t’u mbesin në Kuvend? Roli i numrave në Kuvend është i pa tej kalueshëm për iniciativat serioze të qeverisë. Sa do që të mbaj takime pune qeveria assesi nuk mund ta lë në “ hije” rëndësinë dhe fuqinë që ka Kuvendi i Kosovës. Ecja pa Kuvendin është ecje drejt fundit të qeverie. Pa mbështetjen e Kuvendit të Kosovës nuk mund të kalojnë agjendat e qeverisë në fushën e ligjeve, politikës , ekonomisë, sigurisë etj. Takimet e qeverisë pa numrat në Kuvend janë takime së koti. Një fjalë e urtë populli thuhet sikur “ me rrah ujë në hava”.
Pse po mungojnë numrat, pyetje që nuk po marrim përgjigje ende nga të papërgjegjshmit? Koalicioni PANAL në vrapin për të marrë poste bëri vetëvrasje politike dhe strategjike. Humbi numrat në Kuvend. Flitet edhe për teori konspirative se kinse dikush nga brenda “ka parapa një situatë të tillë ”. A mos është ndonjë paralajmërim disiplinimi për kryeministrit Haradinaj që ai “ ta redaktoj” gjuhën dhe misionin e tij qeverisës deri në atë masë sa që të mos shqetësoj “bosët e krimit dhe korrupsionit” që gjenden brenda koalicionit?! Por ajo që dihet është se ky koalicion mund të shembet edhe para se me hy në dimër. Ky koalicion është krijuar me ambiciet personale të politikanëve dhe do të shkatërrohet pikërisht nga ato ambicie. Vetëm sa vonon se shpëtim nuk ka!
