“Është për keqardhje krekosja e disa liderëve tanë që e mitizuan ndaljen e trenit rus me ikonografi dhe parulla anti shqiptare e nuk tentojnë të ndalin, nëse ka nevojë edhe me forcë strukturat e MUP –it serb, që veprojnë në të gjithë Kosovën si dhe të shtrinin sovranitetin e shtetit edhe në veri ku lulëzon kontrabanda e mbështetur nga strukturat politike nga Beogradi, por edhe nga Prishtina ku ndahen profitet qind milionëshe gjatë një vitit nga struktura politike që e mbrojnë kontrabandën e hapur atje ”, ka thënë Naim Miftari.
Ndodhitë e fundit me të cilat u përballën qytetarët dhe udhëheqësit e Kosovës, siç janë muri në Mitrovicë, arrestimi i liderit të Aleancës për Ardhmërinë e Kosovës, Ramush Haradinajt si dhe tentativat për të futur në territorin e Kosovës trenin me mesazh provokues, janë konsideruar si matje e kapacitetit të Kosovës si shtet. Sipas analistëve, këto ngjarje kanë qenë skenare të mirë përgatitura nga Serbia dhe për këtë arsye sipas tyre, shteti i Kosovës, duhet të përgatitet që të përballet edhe me provokimet e tjera që mund të vijnë nga Serbia.
Njohësi i çështjeve juridike dhe anëtari i Kryesisë së AAK-së, Muhamet Kelmendi ka thënë, se zhvillimet e fundit tregojnë se ky është skenar i mirë përgatitur në Beograd, në Moskë dhe në Paris. “Në prag të ndërrimit të administratës së SHBA-ve, është rritur një vatër e tensioneve politike dhe provokative të Serbisë ndaj shqiptarëve. Muri, burgosja e z. Haradinaj dhe treni janë në vazhdim të provokimeve”, ka thënë Kelmendi për “Bota sot”.
Për më tepër , ai ka shtuar se do të kemi në të ardhmen e afërt edhe provokime të tjera të Beogradit. “Krejt kjo për të parë reagimin e Uashingtonit dhe të Brukselit. Dhe, nëse nuk kemi reagime, intervenimi ushtarakë nga ana e shtetit serb, mund të bëhet. Nëse jo kundër tërë vendit, veriu i Kosovës veç se nuk është pushtuar”, ka thënë Kelmendi.
(Tekstin e plotë mund ta lexoni të Hënën në publikimin e shtypur të gazetës kombëtare “Bota sot”)
