Presidenti Bujar Nishani priti sot në një takim të veçantë kryetarin e Kuvendit të Republikës së Kosovës, Kadri Veseli, i cili po zhvillon një vizitë zyrtare në Republikën e Shqipërisë.
Gjatë këtij takimi, Nishani përshëndeti vizitën e Veselit dhe theksoi se marrëdhëniet vëllazërore dhe shumë të veçanta mes dy shteteve duhet të forcohen e zgjerohen në të gjitha fushat e bashkëpunimit, pasi ato janë thelbësore për të ardhmen e kombit shqiptar, por edhe për stabilitetin dhe përparimin e rajonit.
Gjithashtu kreu i Shtetit vlerësoi dhe përshëndeti të gjitha arritjet e deritanishme të Kosovës dhe qytetarëve të saj për ndërtimin e shtetit të pavarur dhe funksional të Kosovës, si dhe kontributin e rëndësishëm të dhënë në funksion të paqes, sigurisë dhe zhvillimit të rajonit.
Sipas një njoftimi për shtyp, Nishani nënvizoi gjithashtu se shteti i Kosovës ka edhe detyrimet dhe përgjegjësitë e tij në aspektet ndërkombëtare duke filluar me definimin e kufijve me fqinjët dhe përkrahjen e fqinjëve në proceset e integrimit euro-atlantik të tyre.
Ndërkohë gjatë këtij takimi, presidenti e siguroi kryetarin e Kuvendit kosovar për mbështetjen e pakursyer të institucioneve shqiptare për të mundësuar në një kohë sa më të shpejtë të anëtarësimit të Kosovës në organizatat më të rëndësishme ndërkombëtare dhe të avancimit të agjendës evropiane, krahas vendeve të tjera të rajonit.
Kreu i Shtetit e siguroi gjithashtu kryeparlamentarin Veseli se Shqipëria dhe të gjitha institucionet e saj, bazuar në frymën dhe vizionin evropian e euroatlantik, do të jetë gjithnjë në krah të Kosovës, në rrugën e saj të zhvillimit dhe do ta mbështesë pa asnjë rezervë në ruajtjen e pavarësisë, sovranitetit dhe integritetit shtetëror.
Ndërkohë Veseli e falënderoi Nishanin për pritjen e ngrohtë dhe vëllazërore, si dhe për përkrahjen e dhënë për Kosovën dhe të gjithë shqiptarët në rajon.
