Ministrja e Tregtisë dhe Industrisë, Hykmete Bajrami, priti në takim Ministren e Integrimeve Evropiane, Mimoza Ahmetaj, ku temë diskutimi ishte koordinimi ndërinstitucional në përmbushjen e objektivave të Qeverisë së Kosovës lidhur me agjendën e integrimeve evropiane.
Siç njofton MTI, ministrja Bajrami e informoi Ahmetajn lidhur me angazhimet e Ministrisë së Tregtisë dhe Industrisë (MTI) sa i takon zbatimit të programeve që ndërlidhen me integrimet evropiane, sikurse Plani Kombëtar për Zbatimin e MSA-së, Agjenda e Reformave Evropiane. Po ashtu, Bajrami theksoi se deri tani MTI-ja ka bërë një punë të mirë në arritjen e objektivave që bien në mandatin e saj dhe u zotua se të gjitha obligimet lidhur me agjendën evropiane që janë në kompetenca të MTI-së do të zbatohen me sukses.
Nga ana e saj, ministrja Ahmetaj falënderoi Bajramin për bashkëpunimin e deritanishëm institucional dhe tha se Ministria e Integrimeve Evropiane (MIE), do të ofrojë mbështetje dhe bashkëpunim për të gjitha institucionet e vendit, me qëllim të ngritjes në nivel sa më të lartë të koordinimit institucional në funksion të avancimit sa më të shpejt të integrimit të Kosovës në Bashkimin Evropian.
