Sekretari organizativ Dardan Molliqaj në një konferencë për media ka prezantuar matjet e opinionit publik që e ka bërë organizata Omnibus.
Sipas këtij hulumtimi që është bërë në muajin mars në pyetjen se për cilën parti do të votonin qytetarët del se Vetëvendosja ka dal e para me 29 përqind e pasuar nga PDK me 18.4 përqind, LDK me 16.4 përqind, etj.
Molliqaj tha se për këtë matje të opinionit publik organizata Omnibus është paguar me 1 mijë e 600 euro nga Vetëvendosje ndërsa ajo vepron në Kosovë tash e 15 vjet.
Omnibus sipas Molliqajt në këtë matje e ka bërë pyetjen edhe se për cilën parti kanë votuar në vitin 2014 ku për PDK-në kanë votuar 26.40 përqind, për LDK-në 18.4 përqind, Vetëvendosje 15 përqind, AAK 11.60 përqind dhe AKR me 16.4 përqind.
Ja njoftimi i plotë i lëvizjes Vetëvendosje
Lëvizja VETËVENDOSJE! në tre vitet e fundit ka pasur rritje të vazhdueshme. Kjo është vërejtur edhe nga angazhimi në terren, por edhe nga matjet përmes sondazheve të opinionit publik, të bëra nga kompani vendore e ndërkombëtare. Një sondazh i tillë në lidhje me zgjedhjet qendrore të mundshme, i realizuar në javët e para të marsit, u prezantua sot nga Sekretari Organizativ, Dardan Molliqaj.
Fillimisht, Molliqaj foli mbi metodologjinë e hulumtimit dhe demografinë e të anketuarve të cilat flasin për një sondazh mjaft kredibil, për të kaluar më pas tek rezultatet, të cilat e nxjerrin Lëvizjen VETËVENDOSJE! në vend të parë me 20.8%, duke lënë prapa PDK-në me 18,4% dhe LDK-në me 16.4%. Duke hequr ata që kanë refuzuar të përgjigjen se cilën parti do ta votonin, diferenca mes nesh dhe partive tjera thellohet, me ç'rast Lëvizja VETËVENDOSJE! merr 26%, PDK 23%, kurse LDK vetëm 20.4%.
Ajo që vlen të theksohet nga ky sondazh është fakti që Lëvizja VETËVENDOSJE! është partia e parë si zgjedhje e dytë nga votuesit potencial me 13.6%. Nga ky sondazh vërehet po ashtu se Lëvizja VETËVENDOSJE! është subjekti që ruan më së shumti votën, dhe atë në përqindje prej 92.7%, si dhe nga lëvizjet e votuesve më së shumti votues vijnë nga dy partitë e koalicionit qeveritar, 9.1% nga LDK dhe 8.2% nga PDK. Ndërkaq, personat që nuk kanë votuar në zgjedhjet e 2014-së, ku hyjnë edhe votuesit e rinj, në zgjedhjet e ardhshme kanë deklaruar se do ta votonin Lëvizjen VETËVENDOSJE! në përqindje prej 24.1%, që është shifër jashtëzakonisht e lartë krahasuar me gjitha subjektet tjera.
Gjendja në të cilën është katandisur vendi dhe zhvillimet e fundit politike po e bëjnë çdo herë e më të ditur se angazhimi dhe kritika e Lëvizjes VETËVENDOSJE! ka qenë dhe është në vijën e duhur, dhe rrjedhimisht, konfirmohet si subjekti politik i cili mund ta bëjë ndryshimin që i duhet Kosovës. Ne do të vazhdojmë angazhimin në terren, punën dhe organizimin për fuqizimin e organizatës, do të vazhdojmë komunikimin e rregullt me gjithë qytetarët, dhe besojmë se e gjithë kjo do ta mundësojë fitoren tonë në zgjedhjet e ardhshme.
