Hazir Borovci i LDK-së, i cili “foli” sot me presidentin Ibrahim Rugova ka reaguar për të gjithë ata që e banalizuan këtë “bisedë” të tij.
Ai ka sqaruar se çka është metafora, pasi që fjalimin e tij në përvjetorin e LDK-së e ka quajtur fjalim metaforik “Bisedë me Presidentin Rugova”.
Borovci ka thënë se në mesazhin e tij metaforik ka përmbajtje të fjalimeve të cilat Rugova i mbante sa ishte gjallë.
Lexoni reagimin e tij të plotë:
Për (b)analizuesit e fjalimit tim metaforik "Bisedë me Presidentin Rugova", një përkufizim i këtij nocioni: "Metafora është një figurë e fjalimit e cila përshkruan një objekt ose veprim në një mënyrë e cila nuk është fjalë për fjalë e vërtetë, por ndihmon për të shpjeguar diçka ose për të bërë një krahasim".
Përkundër mesazhit metaforik, përmbajtja e porosisë së fjalimit tim gjendet edhe tek fjalimet të cilat, sa ishte gjallë, i mbante Presidenti Historik Ibrahim Rugova. Vizioni i tij për Kosovën shtet të pavarur dhe sovran, në miqësi të përjetshme me Shtetet e Bashkuara të Amerikës, edhe sot, është dhe duhet të jetë një filozofi politike determinuese.
LDK ka për agjendë zhvillimin dhe fuqizimin e gjithanshëm të shtetit dhe nuk merret me individë tek e tuk, të cilët fshehen prapa agjendave meskine. Fuqizimi dhe masovizimi i Degës së III-të të LDK-së, duket se po i pengon dikujt.