Asamblisti i Partisë Demokratike të Kosovës, Naim Bazaj, i cili para disa muajsh ishte larguar nga kjo parti për të garuar për kryetar të Drenasit, e që më pas u tërhoq nga gara, duket se nuk e ka bërë pa ndonjë interes.
Blic nga burime të sigurta ka marrë vesh se para disa javësh në Postën e Kosovës është punësuar vëllai i Naim Bazajt, Fitim Bazaj.
Në listën e të punësuarve në Postë, ku Fitim Bazaj e mban postin e postierit me orar jo të plotë.
“Para disa javësh është punësuar në Postë, vëllai i Naim Bazajt, Fitimi. Bashkë me të, këto ditë janë punësuar edhe disa njerëz të tjerë të PDK-së”, tha burimi brenda Postës së Kosovës.
Ndryshe, Naim Bazaj në zgjedhjet e jashtëzakonshme për kryetar të Drenasit, i kishte hyrë garës, madje duke akuzuar rëndë PDK-në.
Mirëpo, i është dashur vetëm një takim me kreun e PDK-së, Kadri Veseli që Bazaj të tërhiqe nga kjo garë, dhe kësisoj ta mbështes kandidatin e kesaj partie, Ramiz Lladrovcin.
