Lidhja Demokratike e Kosovës, për koalicionin PDK-AAK-NISMA, thotë se është koalicion i territ, ndërsa Aleanca për Ardhmërinë e Kosovës e ka quajtur koalicion të zorit bashkimin me Partinë Demokratike të Kosovës. Derisa zyrtarë nga Nisma kanë deklaruar se ky bashkim forcash erdhi pas një koalicioni të inatit që nënshkruan LDK-ja dhe AKR-ja.
Mirëpo, njohësit e rrethanave politike në vend, konsiderojnë se mocioni i votëbesimit që rrëzoi qeverinë Mustafa, ishte i orkestruar nga Partia Demokratike e Kosovës, nëpërmjet Nismës dhe AAK-së.
Për dy vite e gjysmë, Qeveria e drejtuar nga Isa Mustafa, ishte përballur me kritika të shumta dhe protesta të shpeshta nga subjektet politike opozitare.
Koordinimi mes PDK-së, AAK-së dhe NISMA-s
Politologu Mentor Tahiri, ka thënë për gazetën “Bota sot”, se pavarësisht mohimeve të PDK-së AAK-së dhe Nismës për një koordinim ndërmjet vete për rrëzimin e qeverisë, një gjë e tillë u vërtetua në seancën e votimit të mocionit.
”Pavarësisht se përfaqësuesit e partive politike të “krahut të luftës” janë duke mohuar se kishte organizim të përbashkët për mocion, kjo ishte gati krejtësisht e dukshme si në seancën ku u votua mocioni, ashtu edhe në disa veprime para tij, e rast konkret ishin nënshkrimet me të cilat u thirr seanca”, ka thënë ai.
Kështu, sipas politologut Tahiri, koalicioni i kristalizon gjërat, por në vend se të bëjnë koalicion pas zgjedhor siç kanë planifikuar, tani bënë koalicion parazgjedhor.
“Është e qartë se sondazhet që kanë partitë në duart e tyre, nxjerrin koalicionin LDK-AKR-Alternativa para një PDK-je të vetme. Rrjedhimisht me këtë, koalicioni i “luftës” mund të quhet i zorit vetëm në kuptimin se u arrit para zgjedhjeve, por se në parim këto parti kishin koncept të qartë në synimin për të qeverisur bashkë pas zgjedhjeve”, është shprehur ai.
Etja për pushtet, harruan vijat e kuqe
Nga ana tjetër, analisti Islam Krasniqi, vlerëson se ky koalicion është koalicion i zorit, sepse është lidhur pa vullnetin e palëve.
“Njëri subjekt nga frika së po mbetet në opozitë, dhe një tjetër subjekt nga etja për pushtet u bashkuan duke i harruar vijat e kuqe, dhe u bashkuan për ta mposhtur një pjesë tjetër të cilët ishin bashkuar me idenë për të fituar (LDK-AKR dhe Iniciativa e Kusarii-Deda)”, ka thënë ai.
Krasniqi ka thënë se lidhja e koalicionit është përgatitur më herët nga PDK-ja nëpërmjet Nismës dhe AAK-së.
“Nëse ndalemi dhe i shikojmë koalicionet para zgjedhore, kjo na tregon së kjo është përgatitur më herët, dhe mocioni ishte përgatitur nga vetë partia më e madhe në pushtet, përmes NISMA- s e mbështetur edhe nga AAK-ja, ku gjatë gjithë këtij mandate qeverisës ata në çdo formë janë munduar ta rrëzojnë këtë keq qeverisje siç e kanë quajtur ato ”Opozita”, dhe i harruan vijat e kuqe për një minutë kur erdhi në pyetje posti i kryeministrit”, ka thënë Krasniqi.
Rrëzimi i Qeverisë, me ndihmën e PDK-së
Ndërkaq, analisti Leon Duhanaj, i ka quajtur të pasinqerta deklaratat e zyrtarëve të AAK-së dhe Nismës lidhur me mocionin dhe koalicionin me PDK-në.
“E ka thënë edhe para që të bie Qeveria se, mocioni kundër Qeverisë Mustafa ka vetëm një shans. Pra nëse atë e përkrahë subjekti me i madh dhe me më ndikim në vend, e që është PDK. Deklaratat nga radhët e subjekteve si AAK dhe NISMA, për kin se koalicion i zotit, me duken të pakuptimta, politikisht naive dhe të pasinqerta”, ka thënë ai.
Sipas tij, AAK-ja as në ëndërr nuk do të mund ta realizonte pozitën e Kryeministrit, derisa Nisma po të mos futej në koalicion, si e vetme nuk do kalonte pragun.
“Koalicione zori?! Ndoshta për dy subjektet e mëdha e sidomos PDK-ë. Kjo për arsye se në zgjedhjet e kaluara është krijuar Presedan në lidhje më subjektin që del i pari në zgjedhje. Ndoshta në të kaluarën i ka ndihmuar PDK-së, por kësaj radhe jo edhe aq. Kjo sepse përqindja nuk do të dalë aq e madhe sa që do të mund të ishte pas një koalicioni pas zgjedhorë”, ka thënë Duhanaj.