Në Komisionin për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit është kërkuar që të ketë procesi i Vetingut në sistemin e drejtësisë në Kosovë. Po ashtu, është kërkuar që Kosova të bëjë veting siç ka bërë Shqipëria
Njohësi i çështjeve juridike, Lirim Zorra ka thënë për “Bota sot” se duhet që të bëhet kontrolla e pasurisë pasi që shumica e zyrtarëve kanë keqpërdorur pozitat e tyre përmes korrupsionit dhe formave të tjera.
“Çdo proces i kontrollës së të kaluarës dhe prejardhjes së pasurisë duhet të bëhet sepse përmes kësaj mund të vërehet pastërtia e indeve në fushën politike dhe juridike, sepse është bindja që shumica e tyre kanë keqpërdorur pozitat e tyre përmes korrupsionit dhe formave të tjera”, ka potencuar ai.
Gjithashtu, Zorra ka thënë se legjislativi dhe ekzekutivi nuk e duan procesin e Vetingut pasi që mund të mos kenë dëshmi për prejardhjen e parave të tyre.
“Ky proces është dashur të ndodhë që nga viti 2000, mirëpo, vetë legjislativi dhe ekzekutivi kosovare nuk dëshirojnë një proces të tillë, ku ekspert të pavarur vendor dhe ndërkombëtar do të kishin qasje në shumë burime, xhirollogari dhe elemente tjera të cilat mund të dëshmojnë për mos pasje të dëshmive për prejardhjen e këtyre parave”, ka thënë Zorra për “Bota sot”
Ai nuk ka shpresë se do të ndodh një proces i tillë në Kosovë edhe në Shqipëri, pasi që vetë i korruptuari nuk do të synojë të miratojë një ligj i cili e dërgon në burg apo ja merr pasurinë.
“Mirëpo edhe në Shqipëri procesi është në fillim të tij ende nuk ka masa apo kontrolla sepse të korruptuarit me çdo kusht dëshirojnë të bllokojnë këtë proces sepse jeta e tyre institucionale përfundon po ashtu benifitet që ju kanë sjellë këto pozita i kanë shtrire edhe në familjet e tyre me punësime dhe hapje të firmave të cilat përfitojnë tenderë andaj unë nuk kam shprese se as në Shqipëri dhe as në Kosovë një proces i tillë real do të ndodh sepse vetë i korruptuari nuk do të synojë të miratojë një ligj i cili e dërgon në burg apo ja merr pasurinë”, ka përfunduar Zorra për “Bota sot”.