Komuna e Istogut është e vetmja komunë e cila edhe pas balotazhit të 19 nëntorit nuk ka arritur ta ketë kryetarin e saj, kjo pasi PZAP-ja ka vendosur që të shkojë në rivotim pas ankesës së LDK-së.
Balotazhi i 19 nëntorit ka dhënë fitues Lidhjen Demokratike të Kosovës me kandidatin e saj, Haki Rugova, mirëpo me votat e postës ky rezultat doli në favor të AAK-së dhe kandidatit të saj Gani Dreshaj.
Ky rezultat ka bërë që LDK-ja të “ankohet” dhe ankesa e saj është pranuar, duke u vendosur që më 17 dhjetor qytetarët në Istog të votojnë edhe një herë.
Para mbajtjes së rivotimit, Aleanca për Ardhmërinë e Kosovës ka vendosur të “forcohet” duke nënshkruar kështu koalicion me PDK-në dhe Lëvizjen Vetëvendosje.
Lajmin për koalicionet i ka konfirmuar vetë kandidati i AAK-së për kryetar të Istogut, Gani Dreshaj.
“Për hajër na qoftë. Sapo arritëm marrëveshjen me Partinë Demokratike të Kosovës për koalicion parazgjedhor. Me Beqir Sadikajn i definuam të gjitha detajet e marrëveshjes. Ju betohem se do jetë koalicion i punës dhe të mirës për qytetarin. Bashkë me PDK-në, Vetëvendosjen dhe listën e Arif Elshanit ne do të arrijmë fitore bindëse në zgjedhjet e 17 dhjetorit. I ftoj edhe votuesit e LDK-së që të rreshtohen krah neve sepse me mua kryetar do të përfitoj secili qytetar i Istogut”, ka njoftuar Dreshaj.
Përkundër koalicioneve, analistët politikë shprehen se Lidhja Demokratike e Kosovës vazhdon të jetë garuese shumë serioze në Istog.
Blerim Burjani, analist politik ka thënë për “Bota sot” se LDK-ja duhet të vendos vetë çfarë do të bëjë ta rimarrë Istogun, mirëpo ajo vazhdon të jetë garuese serioze.
Sipas Burjanit, këto zgjedhjet do të demaskojnë paligjshmërinë e votave me post dhe duhet të mbikëqyren mirë nga KQZ-ja.
“Ajo se çfarë duhet të bëjë LDK-ja në mënyrë që ta rimarrë Istogun është çështje e këtij subjekti politik. Sidoqoftë, Lidhja Demokratike e Kosovës edhe më tutje vazhdon të mbetet një garuese shumë serioze në këtë komunë. Këto zgjedhje do të demaskojnë paligjshmërinë e votave me post, votat me post duhet të mbikëqyren drejt dhe të administrohen mirë nga KQZ-ja të mos lejohet që të keqpërdoren votat dhe të manipulohen që mund të çojnë në dëm të serishme të procesit zgjedhor”, ka pohuar Burjani për “Bota sot”.