Përdorja e armëve në ahengje të ndryshme familjare është lajm i shpeshtë në media. Por së fundmi një video e publikuar shfaqi zëvendëskryeministrin dhe ministrin e Diasporës, Dardan Gashin odën e zëvendëskryeministrit tjetër, Fatmir Limajt, duke gjuajtur me armë.
Një gjë të tillë, jo vetëm që e arsyetoi kryeministri i Kosovës, Ramush Haradinaj, por tha se nuk bëhet nami pse kanë gjuajtur me armë dhe e kanë shkelur ligjin zyrtarët e shtetit.
Madje, Haradinaj ka menduar që të propozojë legalizimin e gjuajtjes me armë në ahengje.
Për një gjë të tillë, njohësi i zhvillimeve politike në vend, Haki Abazi, në një prononcim për gazetën “Bota sot” ka thënë se kjo nuk është as e hijshme as e preferuar, derisa kjo nxjerr shumë pyetje në lidhje me gjërat që mund të ndodhin nga gjuajtja me armë.
“Përdorimi i armëve nga zyrtarët e vendit nuk është gjë e hijshme e as e preferuar. Kur përdoren armët, shtrohen një sërë pyetjesh, nëse ato janë legale, nëse përdoruesi ka njohuri paraprake, a rrezikohen njerëzit përreth apo nëse plumbat qorr mund të rrezikojnë njerëzit tjerë. Përdorimi i armëve nuk është gjë e re në Kosovë, ekziston një traditë e gjatë që qitja me pushkë lajmëron harenë e gëzimin në shtëpi por edhe ngjarjet si dasma, gëzime e hare janë momente të festimit të fuqisë dhe fitores”, ka deklaruar Abazi.
Sipas tij, përdorimi i armëve sidomos nga zyrtarët e shtetit nuk duhet të arsyetohet, pasi është një shembull i keq dhe kundër ligjit.
“D.m.th dimensionet se si janë përdorur armët dhe se si ka mbetur një traditë e tillë i ka rrënjët thellë në kanunin edhe traditat shqiptare. Arma njihet edhe një urë lidhëse ndërmjet gjeneratave duke i trashëguar nga brezi në brez. Në ditët e sotme përdorimi armëve nuk mund të arsyetohet sidomos nga zyrtarët meqë japin një shembull jo të mirë dhe sidomos nëse përdorimi tyre është i sanksionuar me ligj e që në rastin në fjalë duket të jetë një situatë e tillë”, është shprehur Haki Abazi për “Bota sot’.