Lëvizja Vetëvendosje ka një muaj që është në një krizë të thellë. Asaj thuajse secilën ditë po i largohen anëtarët e saj. Nga Vetëvendosja deri më tani janë larguar disa edhe nga anëtarët e Këshillit të Përgjithshëm.
Analistët vlerësojnë se Vetëvendosjen e pret një fund i vështirë, ose edhe krijimi i një partie tjetër.
Kështu analisti politik, Islam Krasniqi thotë për “Bota sot” se nëse Vetëvendosja nuk ribashkohet, ajo mund të bie shumë poshtë sikurse AAK-ja.
“Nëse VV nuk ribashkohet përsëri, ajo mund të bije në një nivel shumë të vogël ashtu siç është AAK-ja në shtat apo 8%, mos të themi krejtësisht si NISMA. Unë besoj fuqishëm së VV-ja pas gjithë këtyre problemeve përsëri VV-ja do të ribashkohet dhe do të luftojnë për marrjen e pushtetit, sepse edhe ata mirë e dinë se ndarja nuk i konvenon askujt, as partisë e as individëve që po pretendonin të marrin postin e të parit të partisë”, thekson Krasniqi.
Ai thotë më tutje se në ‘motori’ i Vetëvendosjes është Albin Kurti. “Të gjithë e dinë së motori i VV-së është Kurti dhe pa të VV-ja do të ishte sikur një zogë pa krahë, por etja për pushtet po i joshë individ të caktuar të cilët po e kërkojnë fuqinë përmes mediave duke qenë nëpër ballinat e portaleve me deklaratat e tyre kundër partisë”, thekson ai.
