Analisti politik, Hidajet Ahmeti ka thënë për “Bota sot” se dialogu Kosovë-Serbi është dëshmuar se ka qenë një qasje mbrapshtë, duke fuqizuar Serbinë në raport ndërkombëtarë e duke gjunjëzuar Kosovën karshi Serbisë.
“Politika serbe përmes strategjisë afatgjate sajon probleme të paqena për të shfrytëzuar çdo vakum për interesa politike e gjeostrategjike. Dialogu Kosovë-Serbi është dëshmuar se ka qenë një qasje mbrapshtë, duke fuqizuar Serbinë në raport ndërkombëtarë e duke gjunjëzuar Kosovën karshi Serbisë. Gjashtë vite bisedime, jo që u integruan serbet në institucionet e Republikës së Kosovës, por u fuqizua shteti serb brenda Kosovës”, ka thënë Ahmeti.
Gjithashtu, ai ka deklaruar se pala e Kosovës ka vepruar me logjikën nënshtruese ndaj Serbisë, dhe se kemi ardhur në një gjendje ku të diskutohet për çështje të brendshme ku mund të kontestohet statusi i pavarësisë së Kosovës.
“Logjika e nënshtrimit deri në servilizëm ka ngjallur apetitet e shtetit serb për bosnjëzimin e Kosovës, gjithherë përmes klasës udhëheqëse të korruptuar dhe shantazhuar. Derisa Hashim Thaçi bënë përpjekje me anë të metodave manipulative për të bërë mekanizma për falje dhe pajtim ndëretnik, me qëllimin për tu treguar para ndërkombëtarëve si një “burrështetas”, rrjedhimisht qytetarët e Kosovës anashkalohen dhe fyhen po nga ky njeri me veprime të pamatura dhe të pamenduara mirë. Institucionet e Republikës së Kosovës, paritë politike (pozitë-opozitë), shoqëria civile dhe gjithë mekanizmat shtetërorë duhet të bëhen bashkë kur vie në pyetje interesi kombëtar e nacional”, ka përfunduar Ahmeti për “Bota sot”.