Qeveria aktuale e Kosovës në krye me Ramush Haradinajn, nuk po i realizon premtimet e saj të cilat i bëri gjatë fushatës zgjedhore në vitin e kaluar.
Një ndër premtimet më të mëdha që e bëri Ramush Haradinaj, ishte liberalizimi i vizave brenda 100-ditëshit të tij, por ky premtim nuk u realizua dhe nuk po ka ndonjë shpresë që të realizohet brenda këtij viti dhe siç duket qytetarët e vendit do të mbeten ende të izoluar.
Zyrtari i LDK-së, Bajram Gecaj, në një prononcim për “Bota sot”, tha se kryeministri aktual nuk ka shpreh interes fare për çështjet e mëdha të cilat i kishte premtuar dhe se kjo qeveri dhe ky koalicion sipas Gecajt, do të na dërgojë të gjithëve drejt izolimit, jo vetëm veten e tyre.
“Kryeministri i ri që nga fillimi nuk ka shpreh interes fare për “çështjet e mëdha”, të cilat i kishte premtuar gjatë fushatës, por duket se prioritet e ka akomodimin e interesave parciale. Kjo qeveri dhe ky koalicion duket se do të na dërgojnë të gjithëve drejt izolimit, jo vetëm veten e tyre”, tha Gecaj për “Bota sot”.