Presidenti i Kosovës, Hashim Thaçi tashmë gjendet në Shtetet e Bashkuara të Amerikës, ndërsa pritet t`i bashkohet edhe kryeministri Ramush Haradinajt të cilët do të marrin pjesë në Lutjet e Mëngjesit në Uashington.
Kurse, kryetari i Kuvendit, Kadri Veseli po e zhvillon vizitën e tij në shtetin kroatë. Nga kjo del që të tre kanë shkelur protokollin shtetëror, por sipas ligjeve nuk parashihet që të ketë masa ndëshkimore ndaj tre udhëheqësve shtetëror.
Njohësi i çështjeve juridike, Lirim Zorra ka thënë se ligji nuk parasheh që duhet të ndërmerret ndonjë masë apo ndëshkim ndaj tre liderëve të cilët kanë udhëtuar jashtë shtetit.
“Në aspektin protokollare dhe të sigurisë shtetërore sigurisht që nuk është mirë që tre liderët kryesore të jenë jashtë shtetit në të njëjtën kohë për shkak të ndonjë zhvillimi të papritur në fushën e sigurisë, mirëpo dispozitat ligjore vetëm deklarojnë që paraprakisht duhet koordinim me protokollin shtetërore mirëpo ligji nuk parasheh ndonjë masë ose ndëshkim për këto raste, kjo tregon edhe një herë mos koordinimin e tre institucioneve shtetërore për vizita jashtë shtetit, ku këto vizita më shumë janë për ti treguare popullit që këta lider shkojnë në disa vende në botë dhe që dyert janë të hapure për ta”, ka shpjeguar Zorra.
Gjithashtu, ai ka shtuar se duhet që të bëhet përmirësimi i rregulloreve të protokollit që të behet ndalimi i vizitave të tre liderëve.
“Andaj duhet brenda ligjit për sigurinë shtetërore të parashihet që në të njëjtin moment nuk mund të jenë tre liderë jashtë shtetit, po ashtu që dy liderë të mos jenë në të njëjtin avion për shkak të ndonjë rrëzimi andaj duhet përmirësim i rregulloreve të protokollit dhe ndalim dhe hierka të vizitave jashtë shtetit për këto tri institucione”, ka përfunduar Zorra për “Bota sot”.