Kuvendi i Kosovës, ka shtyrë edhe një herë seancën e jashtëzakonshme për Demarkacionin me Malin e Zi.
Ndonëse ishte paraparë që seanca të niste sot nga ora 12:00, ajo nuk u mbajt fare, për shkak se nuk pati konsensus politik, për ratifikimin e kësaj marrëveshjeje.
Derisa Aleanca për Ardhmërinë e Kosovës insiston që Marrëveshjes që do të votohet në Kuvend t’i bashkangjitet edhe raporti i Shpejtim Bulliqit, kundër kësaj është shprehur Lidhja Demokratike e Kosovës. Kjo e fundit, ka konfirmuar se nuk do ta votojë Demarkacionin me raportin e Bulliqit.
Ndërsa, Lista serbe njoftoi zyrtarisht që nuk do të votojë pro Demarkacionit.
E deputeti i Kuvendit të Kosovës nga Nisma për Kosovën, Milaim Zeka, nuk ka mundur të konfirmojë nëse koalicioni qeverisës i ka numrat, ose jo për miratimin e Demarkacionit.
“Hiq nuk e di”, ka thënë Zeka, në një prononcim për gazetën “Bota sot”.
Por, ai ka konfirmuar se ishin votat e LDK-së dhe të Listës serbe, ato që ndikuan në shtyrjen e seancës, për nesër në ora 10:00.
“Po”, ka thënë ai shkurt, në pyetjen e gazetës.
Ndërkohë, Lëvizja Vetëvendosje, ka thënë se do të votojë kundër Demarkacionit, pasi sipas saj, kjo Marrëveshje është gabim.