Mocion për qeverinë Haradinaj është përmendur që nga krijimi i qeverisjes, por pas arrestimit dhe deportimit të shtetasve turq, deklarata për rrëzim të qeverisë janë shtuar.
Lidhja Demokratike e Kosovës është partia opozitare më e zëshme, sa i përket krijimit të një mocioni mos besues, ndërkaq Kryeministrit tashmë ua ofron edhe votat e partisë së tij.
“Për me shkuar në zgjedhje besoj që edhe na Aleanca jemi aty për votat e LDK-së, edhe koalicioni qeverisës ua jep nëse janë për zgjedhje”, ka thënë Haradinaj sot në një konferencë për media.
Por, Lidhja Demokratike e Kosovës thotë se nuk kanë nevojë për votat e tij.
Deputetja nga radhët e LDK-së, Valentina Bunjaku- Rexhepi, në një prononcim për “Bota sot” ka thënë se LDK-ja ka nevojë vetëm për votën popullore dhe zgjidhja e vetme janë zgjedhjet.
Bunjaku- Rexhepi, ia sugjeron Haradinajt që t’i ruaj votat për vete, sepse i duhen.
“LDK nuk ka nevojë për vota të Haradinajt apo dikujt tjetër. LDK ka nevojë për votë popullore qytetare dhe ta udhëheq vendin mirë dhe sigurt. Zgjidhja e vetme për vendin janë zgjedhjet dhe sa më shpejt aq më mirë, kur kemi parasysh skandalet e një pas njëshme të qeverisë si dhe tani plasaritjet e koalicionit artificial. Haradinajt i sygjeroj t'i ruajë votat për vete, nëse mundet sepse si duket as ato nuk do t’i ketë sikur nuk mund ta ketë me besimin e qytetarëve me të cilët luajti me dinjitetin e tyre. Mocioni për rrëzimin e qeverisë shumë shpejt, e bashkë me të edhe datën e zgjedhjeve dhe orientimin e shtetit drejt BE-së me LDK- në krye te proceseve”, ka deklaruar deputetja e LDK-së, Valentina Bunjaku- Rexhepi.