Opozita vazhdon ta kundërshtojë presidentin Hashim Thaçi si kryesues në bisedimet me Serbinë. E Lëvizja Vetëvendosje që është pjesë e opozitës, ka deklaruar se do të ishte pjesë e dialogut, nëse Thaçi nuk do të ishte udhëheqës i bisedimeve.
Lidhur me këtë, profesori ndërkombëtar, Enver Bytyçi, në një prononcim për gazetën “Bota sot”, ka thënë se dialogu është shumë i rëndësishëm për Kosovën, duke shtuar se mendon që Serbia ka një plan A, B dhe C për këtë, ndërsa Kosova s’ka plan.
“Dialogu me Serbinë është çështja më e rëndësishme dhe më sensitive e kohës për Kosovën. Është edhe për Serbinë, por jam i bindur se në Serbi diplomacia e saj punon me plan A, plan B dhe plan C. Ndërsa Kosova dhe institucionet e saj nuk kanë asnjë lloj plani. Planin A presin t'ua ofrojë ndërmjetësi ndërkombëtar”, është shprehur ai.
Sipas Bytyçit, VV ka të drejtë të jetë skeptike për dialogun dhe lidhet me Thaçin si kryesues, i cili ka bërë lëshime në bisedimet e kaluara.
“Prandaj them se Lëvizja Vetëvendosja e Kurtit ka të drejtë të jetë skeptike në këtë lloj dialogu. Skepticizmi i saj si dhe i qytetarëve të vendit rritet nëse kemi parasysh dhe dy faktorë që lidhen direkt me integritetin e presidentit Thaçi, i cili kryeson dialogun dhe nënshkruan marrëveshjet. Së pari me lëshimet e Thaçit gjatë bisedimeve të shkuara, sepse marrëveshjet që ai nënshkroi ishin jotransparente dhe e çuan Kosovën në kolaps politik”, vlerëson profesori.
Më pas, ai thotë se presidenti ka paralajmëruar “kompromis të dhimbshëm”, e që përkthehet në ndarje të territorit të Kosovës, andaj sipas tij VV duhet të kërkojë standarde për dialog dhe të caktojë vijat e kuqe dhe të argumentojë pse presidenti nuk duhet t’i udhëheq ato.
“Së dyti, sepse Thaçi ka paralajmëruar "kompromis të dhimbshëm"! Kompromisi i "dhimbshëm" nga çdokush përkthehet në ndarje të territorit të Kosovës. Nëse Vetëvendosja është serioze dhe e përkushtuar për vendin, së pari duhet të kërkojë një standard, se si do të zhvillohet dialogu dhe se cilat janë vijat e kuqe. Kjo duhet definuar konkretisht. Më pas të argumentojë se pse presidenti i vendit nuk duhet të kryesojë bisedimet, dialogun dhe për pasojë nuk duhet ta ketë të drejtën të nënshkruajë marrëveshjen me Serbinë”, ka përfunduar profesori Enver Bytyçi për “Bota sot”.