Faza finale e bisedimeve me Serbinë, është kthyer në krye-temë ditëve të fundit.
Partitë politike në Kosovë, ato që janë në krye të shtetit qoftë nga këndi i pozitës apo edhe i opozitës, çështjen e dialogut po e trajtojnë pa i dhënë seriozitetin e duhur.
Kjo temë jetike për të ardhmen e vendit, po shqyrtohet vetëm nëpërmjet deklaratave bombastike të përfaqësuesve opozitarë, në njërën anë dhe heshtjes së qeverisë në anën tjetër.
Në mes të gjithë këtyre zhvillimeve qëndron Presidenti i vendit Hashim Thaçi, i cili pa miratimin e Kuvendit, veçse ka zhvilluar një takim me Presidentin e Serbisë dhe ndërmjetësuesen e BE-së.
Aty, Thaçi ka thënë se kanë biseduar për kornizën e dialogut, duke mos përjashtuar heqjen e vijave të kuqe.
Ky takim u kundërshtua nga subjektet opozitare, por jo aq fuqishëm sa për ta ndalur Thaçin në rrugëtimin e tij drejt BE-së, për t`i arritur kompromiset me Serbinë.
Kur është fjala te kompromiset, i pari i vendit nuk i ka përjashtuar, ndërsa ka paralajmëruar se të njëjtat do të jenë të dhimbshme.
E për këto gjëra, Presidenti i vendit ka ftuar subjektet opozitare që të jenë pjesë e dialogut me Serbinë, duke ua përmendur atyre edhe patriotizmin.
“Ejani dhe bëhuni pjesë e delegacionit të Kosovës. Jepni dijen dhe patriotizmin tuaj në tryezë të bisedimeve me argumentet dhe kundër argumentet. Ky do të ishte veprimi i duhur veprimi më racional dhe i guximshëm, të cilin e presin qytetarët e Kosovës. Gjithçka tjera të gjitha kritikat e pa baza dhe të pamatura, tregojnë vetëm shenja lodhje. Mungesë të përgjegjësisë dhe guximit”, u ka thënë i pari i vendit partive opozitare.
Por, Presidenti ka harruar se ka shumë çështje të papërfunduara me Serbinë, të cilat lidhen pikërisht me patriotizmin që e ka përmendur. Qytetarët ende nuk e kanë dëgjuar Presidentin e tyre, të thotë se Kosova do t`i vërë kushte Serbisë, në fazën përmbyllëse të dialogut. E vetmja gjë që deri më sot është dëgjuar nga Presidenti është përfundimi i dialogut ku s`do të ketë fitues e për më tepër, do të ketë kompromise të dhimbshme, duke mos bërë as të ditur se cilat do të jenë ato.
Në këtë mënyrë, me këto deklarata Thaçi nuk i ka lënë hapësirë opozitës që të pajtohet sadopak me pjesëmarrjen në dialog apo edhe me dhënien e sugjerimeve për dialog.
Derisa opozita nuk do më kompromise, Thaçi veçse i ka paralajmëruar ato. Derisa opozita kundërshton heqjen e vijave të kuqe, Presidenti Thaçi pa pyetur askënd i ka hequr ato.
Qytetarët e Kosovës presin më shumë veprime konkrete nga partitë opozitare lidhur me dialogun.
Në këtë periudhë, kur po vendoset për të ardhmen e Kosovës, i takon opozitës që të reagojë fuqishëm. Vetëm një opozitë e fuqishme do të mund t`i ndalë kompromiset e dhimbshme të Presidentit me Serbinë.
Mbetet të shihet në ditët në vazhdim se, a do të fuqizohet më të vërtetë opozita apo do të vazhdojnë ta shprehin kundërshtimin ndaj dialogut, vetëm brenda katër mureve të selive të tyre apo edhe zyrave në Kuvend.
