Një hienë përballë Sali Berishës, një mace kokëulur përballë Angela Merkel

Politika

Një hienë përballë Sali Berishës, një mace kokëulur përballë Angela Merkel

Drilon Rrahmani Nga Drilon Rrahmani Më 16 gusht 2018 Në ora: 07:27
Hashim Thaçi

Gruaja me fuqinë më të madhe politike në Botë, Angela Merkel, ka fundosur shpresat dhe dëshirën e Hashim Thaçit dhe Aleksandër Vuçiqit për prekjen e kufijve mes Kosovës dhe Serbisë.

Ajo në një deklaratë, ka thënë se, nuk mund të ketë një rivendosje të kufijve në Ballkan, duke aluduar në zërat e fundit rreth shkëmbimit të territoreve mes Kosovës dhe Serbisë, apo termave të tjerë që po i përdorë presidenti i vendit tonë, Hashim Thaçi (ndarje, korrigjim).

Këto deklarata të Angela Merkel, u mundua të mos i përfillë presidenti Thaçi, i cili me ironi e me tentim për shpërqendrim vëmendje, i ka reaguar kancelares gjermane.

Në një postim në Twitter, Thaçi megjithatë ka kërkuar nga shumica e vendeve të Bashkimit Evropian që t’i bindin pesë vendet mos-njohëse si dhe Serbinë që ta njohin Kosovën.

“E përshëndes deklaratën e Kancelares Angela Merkel rreth pacenueshmërisë së kufijve në Ballkanin Perëndimor. Krejt çka mbetet të bëhet është që shumica e vendeve të bashkimit Europian t’i bindin pesë vendet mos-njohëse dhe Serbinë që ta njohin Kosovën me kufijtë që i ka. Sa më shpejt që të arrihet kjo, aq më mirë për rajonin”, kishe shkruar Thaçi.

Një goditje e madhe kjo për presidentin e Kosovës Hashim Thaçi, pasi ky i fundit me të gjithë entuziazmin e tij është përqendruar që të arrihet një marrëveshje historike siç e quan ai, me armikun shekullor serb.

E reagimi i Thaçit ndaj Merkel, do të mund të përkufizohej me thënien e popullit “I fort të rrah e nuk të ’lë të qashë”.

Kjo për shkak se, Thaçi u tregua shumë i ashpër në deklaratat e tij kundër përgjegjëse ndaj ish kryeministrit të Shqipërisë, Sali Berisha, pasi ky i fundit doli haptas kundër idesë së rrezikshme të presidentit të Kosovës.

Thaçi ka thënë se, Kosovës nuk i duhen këshilla nga ata që e kanë ndihmuar Sllobodan Millosheviçin, në vitet e luftës me Kosovën, duke i shitur naftë, në kohën kur Jugosllavia ishte nën sanksione.

Madje, Presidenti i Kosovës ka shkuar edhe më tej duke thënë se këshilla nuk i duhen as prej atij që ka strehuar Osama Bin Landenin dhe ka arrestuar Adem Jasahrin dhe komandantë tjerë të UÇK-së.

Këto deklarata të Angela Merkel, përveç që hodhën ujë në zjarrin e përgatitur nga Vuçiq dhe Thaçi, shfaqën edhe hijen e keqe të urrejtjes së këtij të fundit ndaj shqiptarëve që luftuan për të mirën e kombit dhe idealit për liri.

Kjo për shkak se Thaçi u tregua si një hienë përballë Berishës, ndërsa si një mace kokë-ulur ndaj Kancelares Angela Merkela.

Në anën tjetër, figurat e mëdha të partive opozitare në Kosovë, mirëpritën deklaratat e Merkel rreth çështjeve të territoreve, duke gjetur një lloj përkrahje të madhe në betejën anti-Thaçi.

Në fakt, tani qytetarët e Kosovës mund të flenë “këmbëzbathur” nga frika e idesë famëkeqe të Thaçit, me prapavijë Serbinë e Rusinë.

commentFirst article
Sot mund të lexoni Shfletoni kopertinat