Policia e Kosovës informon dhe jep sqarim për opinionin e gjerë dhe mediat, se me datë 19.09.2016, duke u bazuar në shkresën e datës 2 shtator dërguar nga autoritetet kompetente, respektivisht nga Gjykata Themelore në Prishtinë tek Policia e Kosovës, ku është kërkuar asistencë në ekzekutimin e lëndës në Dardani-Prishtinë, janë ndërmarrë veprime konkrete operacionale për ofrimin e asistencës në ekzekutimin e kësaj lënde sipas vendimeve dhe procedurave ligjore.
“Ju njoftojmë se bazuar në mandatin dhe obligimi që ka Policia e Kosovës, qëllimi i veprimeve të tilla operacionale ka qenë për të ofruar siguri për zyrtarët e autorizuar të Gjykatës Themelore në Prishtinë dhe zyrtarëve të tjerë gjatë proceduarës së përmbarimit të lëndës së potencuar më lart, ruajtja e rendit, qetësisë publike dhe ndërmarrja e masave ligjore ndaj secilit që cenon rendin dhe sigurinë”, thuhet në komunikatë të Policisë.
Policia sqaron se gjatë ndërmarrjes së veprimeve operacionale në ofrimin e asistencës për ekzekutimin e kësaj lënde, banorët nuk janë pajtuar për lirimin e banesave dhe nuk kanë përfillur rekomandimet dhe as urdhrat e zyrtarëve kompetentë dhe në drejtim të zyrtarëve policorë kanë hedhur gjësende, si: ujë me shishe, kova të ujit, gjësende të forta (gurë) etj, përderisa një zyrtar policor dhe disa persona tjerë kanë pësuar lëndime, Policia ka shoqëruar për intervistim disa persona.
Policia e Kosovës, megjithatë ka arritur ta vë situatën nën kontroll duke krijuar kështu kushtet e nevojshme për ekzekutimin e lëndës nga organet kompetente.
Policia po ashtu ka bërë një sqarim edhe ndaj reagimit të KMDLNJ-së e cila më herët ka reaguar
Duke thënë se “përdorimi i forcës së tepruar nga ana e Policisë së Kosovës dhe nga ana e banorëve ka qenë e panevojshme”.
Sipas Policisë kjo paraqet një deklaratë jo profesionale dhe të pa definuar qartë. Policia e Kosovës të gjitha veprimet e saj i ndërmerr duke u bazuar në ligje të aplikueshme dhe sipas procedurave standarde të operimit, gjithnjë duke pas parasyshë të drejtat njerëzore, dhe ri-konfirmojmë se: Policia në asnjë rast nuk ka perdor forcë të tepruar, por të gjitha veprimet për garantimin e sigurisë së përgjithshme dhe garantimin e sigurisë së zyrtarëve kompetent për realizimin e vendimeve të autoriteteve kanë qenë të domosdoshme dhe proporcionale për të arritur objektivat ligjore.
“Edhe një herë sqarojmë për opinionin e gjerë se Policia është institucion i zbatimit të ligjit, dhe njëkohësisht ka obligim ligjor dhe është detyrim i saj zbatimi e vendimeve të autoriteteve kompetente të drejtësisë, megjithatë ju garantojmë se në çdo veprim operacional policor jemi të përkushtuar të shfaqim profesionalizëm dhe respektim të të drejtave të garantuara njerëzore.
