Një rrugë në Durrës që deri pak kohësh njihej si rruga e lushnjarëve, sot mban emrin e mbretëreshës së këngës shqiptare, Vaçe Zela. Ishte një propozim i banorëve të lagjes, që u paraqit në mbledhjen përkatëse të Këshillit Bashkiak Durrës dhe mori miratimin e shumicës gjashtë muaj më parë. Banorët shprehen se emërtimi i një rruge me emrin Vaçe Zela, është një nderim për ta por dhe për ikonën e muzikës shqiptare, për kontributin e jashtëzakonshëm qe ajo dha në artin shqiptar.
Vetëm 4 kilometra larg qendrës së Durrësit, rruga me gjatësi 170 metra ndodhet në Shkozet, afër zonës më të madhe industriale të Durrësit por dhe kryqëzimit të arterieve të mëdha automobilistike që lidhin jugun me Veriun përmes Durrësit. Përballë emrit të madh të Vaçe Zelës që rruga mbart, banorët kërkojnë më shumë vëmendje nga pushteti vendor në drejtim të infrastrukturës .
