Gjatë punimeve të Kongresit të XXI të PPE-së, Kryeministri Berisha zhvilloi një takim me Zëvendës kancelarin dhe Ministrin e Jashtëm të Austrisë, z. Michael Spindelegger.
Siç thuhet në komunikat,Kryeministri e falënderoi z. Spindelgger për mbështetjen dhe vendimin për dërgimin në Shqipëri të përkrenares dhe shpatës së heroit tonë kombëtar, Gjergj Kastriot Skënderbeu, për periudhën e festimeve të 100 vjetorit të shpalljes së pavarësisë. Kryeministri, duke nënvizuar vlerën e jashtëzakonshme simbolike të armëve të Skënderbeut, e vlerësoi këtë si një gjest shumë miqësor nga ana e Austrisë.
Në takim, Zëvendës kancelari Spindelegger e cilësoi raport progresin e Komisionit Evropian në lidhje me Shqipërinë si shumë pozitiv dhe e siguroi Kryeministrin për mbështetjen e palëkundur të Austrisë në procesin e vendimmarrjes për statusin kandidat dhe ne hapat e mëtejshëm për integrimin evropian. Ai theksoi se, pavarësisht situatës së vështirë politike, Shqipëria dhe mazhoranca qeverisëse kanë bërë shumë përpjekje dhe ka arritur shumë në rrugën e modernizimit dhe integrimit.
Kryeministri falënderoi për mbështetjen e qeverisë dhe parlamentit austriak dhe theksoi se, pavarësisht rrugës me sfida që ndodhet përpara, qeveria shqiptare është e palëkundur në progresin e shpejtë drejt Bashkimit Evropian. Ai i cilësoi si te drejta kërkesat e KE-së për dhënien e statusit dhe u angazhua se mazhoranca do bëjë gjithçka të mundur që të përmbushë këto detyrime, por nënvizoi se për këtë është e nevojshme që opozita gjithashtu të heqë dorë nga bllokimi i ligjeve të kërkuara nga BE-ja.
Bashkëbiseduesit shkëmbyen mendime në lidhje me forcimin e marrëdhënieve ekonomike dhe investimeve austriake në Shqipëri. Kryeministri siguroi z. Spindelegger se qeveria shqiptare është e gatshme të krijojë ambient sa më pozitiv për këto investime.
Në takim u bisedua edhe për forcimin e marrëdhënieve midis dy partive. Kryeministri ftoi përfaqësues të partisë së z. Spindelegger të vizitojnë Shqipërinë, duke theksuar se sapo ka filluar fushata që do të çojë në mandatin e tretë të PD-së. Z. Spindeleger u shpreh se qeveria e Kryeministrit Berisha ka arritur shumë gjatë këtyre dy mandateve dhe ka shumë për t'i treguar elektoratit, duke shpalosur një trajektore të sigurt të zhvillimit në të ardhmen.BS