Një ditë pas vendimit të formë së prerë të dhënë nga Gjykata e Apelit për çështjen ‘Gërdeci’, prokuroria ka firmosur ditën e sotme 15 urdhër-arrestet për të akuzuarit kryesorë të ngjarjes së rëndë me 26 viktima.
Firmosja e urdhër-ekzekutimeve nga organi i akuzës i hap rrugë policisë së shtetit të realizojë arrestimet e tyre.
Gjykata e Apelit, në vendimin e saj përfundimtar vendosi të zbuste dënimet e dhëna nga shkalla e parë për të akuzuarit kryesorë të kësaj ngjarjeje. Sipas këtij vendimi, Ylli Pinari, ish kreu i MEICO, dënohet me 15 vjet burg, nga 18 të dhëna në shkallën e parë, por për shkak të gjykimit të shkurtuar do të bëjë vetëm 10 vite burg; Mihal Delijorgji dhe Dritan Minxolli, përkatësisht me 7, 5 dhe 12 vite burg, duke përfituar ulje të një të tretës së dënimit dhe nëse merret parasysh koha e gjatë e paraburgimit për shkak të zvarritjes pa fund të çështjes, Delijorgji me shumë gjasa nuk do të bëjë asnjë ditë burg.
Vendimi i Apelit solli edhe reagimin e menjëhershëm të familjarëve të viktimave të Gërdecit të cilët të indinjuar, e cilësuan një farsë vendimin e drejtësisë, pasi sipas tyre fajtorët vetëm sa u shpërblyen me ulje të dënimit.
15 urdhër-ekzekutimet e firmosura nga Prokuroria (koha që u ka mbetur për të bërë burg)
Mihal Delijorgji – 3 muaj e 24 ditë
Ylli Pinari – 3 vjet e 7 muaj
Luan Hoxha – 5 vjet
Dritan Minxolli – 5 vjet e 7 muaj
Sokol Ngjeçi – 3 vjet e 7 muaj
Dashnor Çaushi – 3 vjet
Armand Tartari – 1vit
Ndue Marku – 1 vit
Zenun Fero – 3 vjet
Hysni Çoçka – 3 vite burg
Fatmir Kuçi – 1 vit
Gëzim Oshafi – 3 vite burg
Denis Hajdari – 1 vit burg
Fari Toska – 3 vite burg
Jorgo Mino – 3 vite burg