Kryetari i Kuvendit Ilir Meta i ka drejtuar një apel partive politike që të lënë mënjanë interest e ngushta partiake dhe të nisin nga puna për dekriminalizimin.Apeli vjen në një kohë kur Komisionet Parlamentare do të nisin shqyrtimin e drafteve ligjore të propozuara njëri nga Qeveria dhe tjetri nga opozita në lidhje me procesin e dekriminalizimit. Një ditë pasi Kuvendi u përfshi nga akuza dhe debate të forta mes pozitës dhe opozitës në lidhje me dekriminalizimin, Kreu i Parlamentit tha se diferencat mes drafteve ligjore janë të vogla, ndaj kërkoi mos gjetjen e preteksteve për të zvarritur procesin.
“Ka disa diferenca të cilat kërkojnë një frymë më bashkëpunuese në gjetjen e konsensusit për të realizuar një proces gjithëpërfshirës në këtë drejtim. Edhe në rast se do të jetë e vështirë për arsye të interesave të ngushta politike dhe lojërave të panevojshme në këto momente, domosdoshmëria e realizimit të tyre do të na rrisë përgjegjshmërinë që për ato çështje që mos të ketë konsensus të kërkojnë ndihmë vlerësimin e partnerëve ndërkombëtarë”, u shpreh Meta.
Meta tha se të dyja draftet janë pjesë e programit të punës së parlamentit. “Qeveria një nismë më e plotë dhe e adreson më në themel këtë fenomen. Është e qartë si drita e diellit që të dyja këto nisma kanë një përputhshmëri shumë të gjerë, kanë edhe diferenca që nuk i bëhen pengesë që ky proces të zgjatet pa fund”, - u shpreh Meta.
I pyetur për deklaratën edeputetit të LSI-së Spartak Braho, sipas të cilit ka deputetë të të dyja kaheve politikë që përdorin lëndë narkotike, Meta tha se bie në kontraditë me formimin e tij si jurist, ndaj i kërkoi Brahos që të ndjekë rrugën e drejtësisë.
Kryeparlamentari Meta u pyet edhe për raportin e prezencës së OSBE-së në Shqipëri me informacione mediatike për selinë qendrore në Vjenë. Meta tha se ambasadori kërkoi falje dhe se "nuk ja vjen të merremi me një karagjozllëk”.
