Avokati i Popullit nisi investigimin në lidhje me sinjalizimet për ushtrim dhune nga policia ndaj disa studentëve të përfshinë në një incident me Kryeministrin. Por përfaqësueset e Avokatit të Popullit fillimisht u penguan të kryejnë detyrën e tyre kushtetuese, duke mos u lejuar të hyjnë në ambientet e Drejtorisë së Policisë.
“Pas qëndrimit tonë, të bërë publik edhe në media, në ambientet e Drejtorisë së Policisë u lejua të hyjë vetëm njëra nga ekspertet e Avokatit të Popullit. Për këtë arsye institucioni ynë ka nisur një tjetër hetim për të zbuluar personat dhe shkaqet e ndalimit të ekspertëve të Avokatit të Popullit për të kryer detyrën e tyre kushtetuese, atë të verifikimit nëse ndaj studentëve është ushtruar dhunë ose jo.
E ritheksojmë se askush nuk duhet të pengoj punën e Avokatit të Popullit dhe zbatimin e kompetencave të tij kushtetuese, duke shkelur ligjet e Republikës së Shqipërisë dhe Konventat Ndërkombëtare. i bëjmë thirrje titullarëve të policisë që qëndrime të tilla të mos ndodhin më në të ardhmen”, thuhet në një reagim të Institucionit të Avokatit të Popullit.