Dorëheqja e Nasip Nacos nga posti i ministrit të Drejtësisë mund të cojë në një riformatim të Qeverisë, nëse postin qeveritar nuk do ta marrë sërisht një emër i propozuar nga Lëvizja Socialiste për Integrim. Nëse kjo e fundit do të propozojë emrin që do të zëvendësojë Nacon në detyrën e ministrit të Drejtësisë, atëherë i vetmi ndryshim në Qeveri është në këtë pozicion. Burime nga koalicioni qeveritar theksojnë se alternative tjetër, ajo që Ministria e Drejtësisë të drejtohet nga një emër që do të përfaqësojë PS-së, atëherë priten të tjera lëvizje në postet ministrore, për të respektuar kuotat e bashkëqeverisjes mes socialistëve dhe LSI-së. Emrat që përfliten për postin e ministrit të Drejtësisë janë Ylli Manjani, Sajmir Tahiri dhe Fatmir Xhafaj, i cili prej muajsh drejton procesin e reformës në drejtësi. Nëse Manjani do të propozohet nga Meta për postin qeveritar, atëherë ky do të ishte ndryshimi i vetëm në kabinetin Rama. Por nëse pasardhës i Nacos do të zgjidhet Tahiri ose Xhafaj, Kryeministri do t’I duhet të mendojë për një nga ministritë që sot drejtohet nga emra të propozuar nga PS, për t’ia kaluar LSI.