Deputetët komentojnë ndryshimet në qeveri.
Deputeti i Partisë Demokratike Astrit Patozi tha se dorëheqja e Nasip Naços nga posti I ministrit të Drejtësisë është “provë e faktit që kemi një qeveri të rrëzuar”.
Astrit Patozi: “Ju thoni që është ndryshuar një ministër por unë ka të paktën një muaj që deklaroj se ka rënë qeveria dhe unë i qëndroj kësaj pikëpamjeje. Dje ishte një provë, e faktit që ne kemi një qeveri të rrëzuar. Dje nuk është rrëzuar Ministri i Drejtësisë por në fakt është ndërruar kryeministri. Nga dje nuk kemi kryeministër Edi Ramën por kemi kryeministër Ilir Metën”
Deputeti socialist Bashkim Fino u shpreh kundër ndryshimeve në qeveri.
Bashkim Fino: “Ky është mendimi im personal. Vlerësoj punën e Naços, shpresoj qe ministri i ri të jetë në lartësinë e tij. Unë nuk mendoj që kryetari i LSI-së i imponohet kryeministrit, ata janë dy partnerë kanº kontratë të përbashkët për të qeverisur”
Deklaratat e deputetëve u bënë për gazetarët paraditen e sotme jashtë ambienteve të kryesisë së Kuvendit.
