Ministri i Financave Arben Ahmetaj nuk e sheh të nevojshme krijimin e qeverisë teknike, duke dalë kështu kundër deklaratës së fortë që kreu i LSI-së Ilir Meta bëri gjatë ditës së djeshme.
I pyetur nga gazetarët në lidhje me qëndrimin e Metës për qeveri teknike ekspertësh dhe mbajtje të zgjedhjeve të parakohshme pas reformës në drejtësi, Ahmetaj tha se “qeveria po vazhdon punën e saj dhe se qeveria e ekspertëve nuk është zgjidhja e duhur".
“Qeveria teknike nuk është e nevojshme për ekonominë shqiptare. Në kohë normale qeveritë teknike nuk kanë pasur sukses”, u shpreh ai.
I vetmi që ka dalë në mbështetje të qëndrimit të Metës deri më tani është kreu demokrat Lulzim Basha.