Pavarësisht dallimeve ndërmjet pozitës e opozitës në Tiranë sa i përket votimit të reformës në drejtësi, Kryeministri shqiptar Edi Rama, njëkohësisht kryetar i Partisë Socialiste, ka lënë të kuptohet se kjo reformë patjetër që do të votohet.
Rama ka shkruar në llogarinë e tij në facebook një status në atë mënyrë që heq dilemat se kjo reformë do të dështojë.
“Opinioni ynë është po ai i njëjti prej kohesh: Çdo gjë për konsensusin dhe Reforma në Drejtësi o do votohet o do votohet!”, ka shkruar kreu i PS-së, Edi Rama.
Ndërkohë, Kuvendi i Shqipërisë është mbledhur në mënyrë që të votohet kjo reformë. Por në orët e para kanë dalë disa mospajtime ndërmjet pozitës e opozitës.
Kjo ka bërë që seanca të ndërpritet kurse dialogu ndërmjet palëve të mbahet me dyer të mbyllura.
Miratimin e kësaj reforme me konsensus e kërkojnë SHBA-të dhe BE-ja.
