Arben Frroku, i dënuar me burgim të përjetshëm për vrasjen e komisar Dritan Lamajt është paraqitur sot përpara Gjykatës së Amsterdamit në Holandë, pasi u kap me dokumente false në aeroport. Frroku, në gjykatë ka pretenduar se është viktimë e një loje politike në Shqipëri, duke shtuar se është i pafajshëm.
Ai deklaroi se nuk duhet të ekstradohet drejt Shqipërisë, pasi është i kërcënuar nga hakmarrja. Frroku madje ka pretenduar se nuk mbrohet në mënyrën më të mirë të mundshme, pasi avokatin ia ka caktuar shteti, raporton “ABC News”. Avokati i tij ka thënë në gjyq se Frroku nuk mund të kthehet në Shqipëri, pasi rrezikohet nga hakmarrja e se mund të eliminohet fizikisht. Arben Frroku është dënuar me burgim të përjetshëm nga Gjykata e Apelit e Krimeve të Rënda për vrasjen e kryekomisarit Dritan Lamaj, në vitin 2013.
Frroku fillimisht u shpall i pafajshëm nga Shkalla e Parë e Krimeve të Rënda dhe më pas u arratis nga Shqipëria, para se Apeli të ndryshonte vendimin. Ai u kap në Holandë me dokumente të falsifikuara, gjë për të cilën janë njoftuar autoritetet shqiptare.
Organet përkatëse në Tiranë kanë kërkuar ekstradimin e Frrokut nga Holanda, me qëllim që të vuajë dënimin me burg të përjetshëm. Vendimi përfundimtar për ekstradim të tij ose jo, do të merret pas dy javësh.
