Një deklaratë e Kryeministrit Rama gjatë një komunikimi me ndjekësit në rrjetet sociale, se qeveria e ka të pamundur të investojë në infrastrutkurën rrugore dhe ujësjellësa, për shkak të mungesës së parave në buxhet, ka sjellë reagimin e Lulzim Bashës. Kryetari i Partisë Demokratike thotë në një deklaratë të posaçme, se paratë mungojnë, pasi sipas tij, vidhen përmes korrupsionit dhe shkojnë për luks qeveritar.
“1 miliardë euro vidhen e shpërdorohen çdo vit në tatime, dogana, tendera dhe koncesione hajdutërie. S’ka si të ketë lekë për qytetarët, thesi zbrazet për rehatinë e Ramës e hajdutëve të tij. Por ka 80 milionë dollarë për mobilim zyrash e blerje makinash. Ka 15 milionë dollarë për bileta avionësh. Ka 320 milionë euro për koncesionet hajdutërore të Ramës e Beqës në shëndetësi. Ka para për udhëtime me charter, për syze 70 mijë euro e për hotelet më luksoze të botës.”
Duke cituar një raport të Departamentit Amerikan të Shtetit, Basha thotë se, ky është fundi i një qeverisje të korruptuar në palcë, që do t’i kthehet qytetarëve pas ardhjes së demokratëve në pushtet, perms uljes së taksave, investimeve publike dhe vendeve të reja të punës.
