Pas lajmit të publikuar lidhur me kërcënimin ndaj Prokurorit të Përgjithshëm, Adriatik Llalla, mëngjesin e së mërkurës në Komisionin për Siguri Kombëtare, ka mbërritur një shkresë e firmosur nga deputetët socialistë: Xhamal Qefalia dhe Arben Çuko.
Në shkresën drejtuar kryetarit të këtij komisioni, Spartak Brahos, dy deputetët e cilësojnë si shumë të rëndë ngjarjen, e cila cënon sigurinë kombëtare dhe minon besimin e çdo qytetari për sigurinë publike dhe kërkon vëmendje maksimale nga të gjithë institucionet.
Përpara këtyre fakteve, deputetët kërkojnë që të thirren në një seancë dëgjimore për këtë ngjarje, Prokurori i Përgjithshëm, Adriatik Llalla, Drejtori i SHISH-it, Visho Ajazi Lika dhe Drejtori i Policisë së Shtetit, Haki Çako.
