Bregu: PS të mos harrojë si e pengoi integrimin për 3 vjet rresht

Shqipëria

Bregu: PS të mos harrojë si e pengoi integrimin për 3 vjet rresht

Më: 10 nëntor 2016 Në ora: 16:19
Majlinda Bregu

Deputetja e PD, Majlinda Bregu, duke marrë fjalën në seancë plenare i ka kujtuar mazhorancës se, dje në opozitë e pengoi për 3 vite rresht procesin e integrimit.

“Sikur për 3 vjet rresht mazhoranca e sotme të mos bllokonte statusin, Shqipëria do ta kishte marrë datën e negociatave me kohë. Në 2013, në dialogun e nivelit të lartë, me tone përgëzuese për qeverinë e ikur dhe inkurajimi për qeverinë e re, komisioneri Shtefan Fyle njoftoi dhënien e statusit të vendit kandidat”, ka thënë Bregu. 

Bregu, e cila votoi ndryshe nga kolegët e saj demokratë në Bruksel, i ka cilësuar si absurde gëzimet e qeverisë aktuale për rekomandimin pozitiv. 

“Kryeministri bën foto me celularin e tij, ministrja e Integrimit shpërthen në buzëqeshje sepse dhënia e rekomandimit erdhi në kohën e saj. Ndërsa unë buzëqesh sepse detyrimet ishin realizuar nga meritat e qeverisë time. Por PD ka meritën e saj që nga anëtarësimi në NATO, liberalizimi i vizave dhe pse jo pavarësia e Kosovës”, ka thënë Bregu.

Sipas saj, integrimi “është një proces që gënjeshtarit i demaskon krekosjen e që nuk të jep vota askujt, as PS-së e as PD-së. 

“As Rama, as Basha e askush tjetër nuk ka për t’u shpërblyer nga votuesit shqiptarë me ndonjë votë më shumë”, ka vijuar Bregu. 

“Unë nuk do t’ia lejoja vetes të festoja si Edi Rama dje. Ne jemi një vend ku ligji nuk zbatohet, ku fshatari i pamundur burgoset dhe kriminelët i sjellim në Parlament. Prandaj reforma në drejtësi është kusht”, ka shtuar ajo.

Sot mund të lexoni Shfletoni kopertinat