Kryetari i Partisë Demokratike në Shqipëri, Lulzim Basha është shprehur se krimet e fundit brenda familjes, reflektojnë gjendjen e varfërisë dhe dëshpërimit ku ka hyrë shoqëria jonë.
“Jam i tronditur nga krimet e tmerrshme në familje, në Fier dhe në Korçë. Jam veçanërisht i hidhëruar që këto krime kanë marrë jetë të pafajshme fëmijësh dhe grash”, shkruan Basha në një status në “Facebook”.
“Këto ngjarje më shumë se krime individuale reflektojnë gjendjen e varfërisë dhe dëshpërimit ku ka hyrë shoqëria jonë, si dhe rënien e mbështetjes shoqërore për njëritjetrin. Shqipërisë duhet t’i kthehet shpresa, duhet t’i kthehen mundësitë në mënyrë që të gjithë të jetojnë të mirëqenë dhe të qetë. Politika ka rolin kryesor për këtë gjë: ajo duhet të pushojë së punuari për pakicën dhe duhet t’u rikthehet njerëzve dhe halleve të tyre. Ne nuk mund të vrasim njëri tjetrin, duhet të vrasim politikën e keqe. Ne duhet të japim jetën për fëmijët tanë dhe jo të marrim jetë fëmijësh”, shprehet Basha.