Ashtu siç ishte parashikuar, gjatë ditës së sotme, zonat malore janë mbuluar nga dëbora dhe akset janë të kalueshme kryesisht me zinxhirë.
Reshjet e borës vijojnë intensivisht në zonën e Pukës dhe të gjitha akset rrugore janë të kalueshme me zinxhirë. Ndërkohë bëhet e ditur se akset Fushë-Arrëz - Iballë dhe Pukë-Qelëz, janë të bllokuara.
Gjithashtu njoftohet se edhe rrugët rurale në Pukë janë të bllokuara. Ndërkohë për në pjesën tjetër të vendit moti parashikohet të jetë i vranët.
Gjatë ditës së sotme priten reshje shiu të herëpashershme me intensitet të dobët deri mesatar, lokalisht reshjet e shiut në formën e shtrëngatave dhe stuhisë do të jenë në Jugperëndim.
Në zonat malore në Verilindje dhe Juglindje priten reshje të dendura dëbore, ndërsa prej orëve të mbrëmjes reshjet e borës do te shtrihen deri në lartësitë kodrinore.
