Akti normativ i miratuar nga qeveria në fund të muajit dhjetor ndryshoi për herë të dytë buxhetin e shtetit brenda vitit.
Ministri i Financave, Arben Ahmetaj u shpreh gjatë prezantimit të Aktit Normativ në komisionin parlamentar të Ekonomisë dhe Financave se pavarësisht ndryshimeve është ruajtur niveli i defiçitit buxhetor, ndërsa të ardhurat janë realizuar në masën 98 %.
Me ndryshimet që iu bënë buxhetit, përmes këtij Akti Normativ, sipas ministrit Ahmetaj, janë shlyer të gjitha detyrimet e prapambetura të krijuara rishtaz ndaj kompanive private.
Ish ministri i Financave, Ridvan Bode deklaroi se Akti Normativ i sjellë nga qeveria ka karakter elektoral, ku i referohej konkretisht “paketës së solidaritetit”.
Akti normativ u miratua nga qeveria në muajin dhjetor me qëllim rishpërndarjen e fondeve brenda buxhetit dhe financimin e ‘paketës së solidaritetit’ për pensionistët dhe shtresat në nevojë në fund të vitit.
Katër miliardë lekë u akorduan për shpërblimet e fundvitit, 450 milionë lekë për shlyerjen e dëmshpërblimeve nga fatkeqësitë natyrore dhe 142 milionë për shlyerjen e detyrimeve për mirëmbajtjen e rrugëve.
Ndërkohë, 3.66 miliardë lekë u alokuan për shlyerjen e detyrimeve të prapambetura për kontratat e punimeve në infrastrukturë. 3.3 miliardë lekë të tjera u dhanë për Fondin e Zhvillimit të rajoneve, për t’u investuar në infrastrukturën e rrugëve rurale.
Akti normativ u botua në fletoren zyrtare më datë 20 dhjetor dhe, sipas Kushtetutës, ai duhet të miratohet nga Kuvendi brenda 45 ditësh për të marrë fuqi të plotë ligjore.