“Autorët erdhën direkt në xhamin e makinës dhe bërtitën që armët t’i linim tek këmbët. Nuk na lanë kohë të vepronim”.
Kështu kanë dëshmuar tre policët privatë të arrestuar nga policia e Tiranës si dhe dy shoferët e blindave.
Burime pranë policisë bënë me dije se të pestë personat u morën në pyetje me radhë veçmas nga njeri-tjetri, por sipas tyre nuk kanë mundur të identifikojnë asnjërin prej autorëve.
Gjatë dëshmisë të arrestuarit kanë rrëfyer se në momentin e parë që makina u doli përpara dhe përplasi blindin e parë kishin menduar se ishte një aksident rrugor, por gjithçka e kishin kuptuar kur nga mjeti dolën personat e armatosur.
Ata thanë se agresorët kanë qëlluar fillimisht me breshëri duke çarë gomën e parë. Më pas autorët janë afruar në xhamin e mjetit të parë dhe i kanë kërkuar që të linin armët tek këmbët dhe të zbrisnin nga makina. E njëjta gjë ka ndodhur edhe me personat në blindin e dytë.