Auditime të thella do të nisin nga KLSH për firmat që operojnë në industrinë e nxjerrjes së naftës dhe gazit dhe përpunimin nga ana e tyre. Sipas kryetarit të KLSH, Bujar Leskaj, ato po shkatërrojnë vendburimet duke i shpërdoruar ato. Shqetësimet dhe problematikat u ngritën gjatë takimit që kryetari i KLSH-së, Bujar Leskaj, pati me Unionin e Punonjësve të Shqipërisë, ku u kërkua zgjidhje për 410 naftëtarët e larguar nga puna nga Albpetrol.
Kontrolli i Lartë i Shtetit do të thellojë auditimet për firmat që ushtrojnë aktivitetin e tyre në fushën e industrisë nxjerrëse të naftës dhe gazit, dhe përpunimin e tyre.
Kështu u shpreh kryetari i KLSH-së, Bujar Leskaj, ku veçoi se janë evidentuar keqadministrime, shpërdorim dhe shkatërrime të qëllimshme të vendburimeve.
Problemet në këtë sektor u ngritën edhe nga sindikalistët në takimin që kreu i KLSH-së Leskaj zhvilloi me Unionin e Punonjësve të Shqipërisë.
Takimi u fokusua në kërkesën e sindikalistëve lidhur me pushimin nga puna të 410 naftëtarëve nga Kompania “Albpetrol”.
Inxhinieri Prof.Dr.Gjergji Foto, u shpreh se punonjësit e industrisë së naftës janë të shfrytëzuar, duke punuar për vite me radhë në kushte të vështira dhe aktualisht nuk po përfitojnë as dëmshpërblimin që u takon për largimin me pa të drejtë nga puna.
Unioni iu drejtua KLSH-së për zgjidhje të kësaj situate dhe Leskaj premtoi se insitucioni i drejtuar prej tij, do të trajtojë këto probleme të ngritura, duke i vlerësuar si një çështje me interes të lartë publik.
Leskaj rekomandoi se punonjësit e naftës kanë të drejtën e tyre të ndjekin këto çështje në rrugë ligjore, duke përdorur pa dyshim edhe zgjidhjet konkrete të propozuara nga KLSH.
Së fundimi Kuvendi i Shqipërisë ka miratuar ligjin për punonjësit e industrisë së naftës lidhur me kushtet e punës, sigurinë, shëndetin dhe trajtimin e veçantë në moshë pensioni.
