Vazhdon misioni i përgatitjes së kapaciteteve njerëzore në ndihmë të fëmijëve me autizëm.
Fondacioni Fëmijët Shqiptarë çertifikoi sot edhe 42 profesionistë, të cilët u trajnuan gjatë vitit 2016 në dy kurse kualifikimi. Ata vinin nga Kosova, Maqedonia dhe rrethe të ndryshme të Shqipërisë.
Ky çertifikim i dedikohet kualifikimit të dijeve për një periudhë tre mujore studimore në Qendrën Rajonale për Autizmin në Farkë për një nga metodat më të avantazhuara sot në trajtimin e Autizmin, metoda ABA, ose siç njihet ndryshe, analiza e sjelljes së aplikuar), si mjet për të përmirësuar aftësi të caktuara te fëmijët me Çrregullim të Spektrit të Autizmit (CSA).
Në ceremoninë e shpërndarjes së çertifikatave asistoi drejtuesja e Fondacionit Liri Berisha, drejtuesi shkencor i qendrave të autizmit, Ariel Çomo si dhe drejtuesja e ekipit të profesionistëve Juliana Esaj.
Dr.Liri Berisha e vlerësoi këtë proces një fat të madh për fëmijët me autizëm, pasi falë formimit të më shumë profesionistëve shtohen edhe mundësitë e trajtimit terapeutik për fëmijët me këtë çregullim.
Ajo e vlerësoi bashkëpunimin e fondacionit me ministrinë e Shëndetësisë dhe ministrinë e Punës dhe Çështjeve Sociale si tejet të rëndësishëm, pasi i jep seriozitetin e duhur këtyre çertifikatave. Duke i uruar suksese në misionet e tyre, Dr. Liri Berisha premtoi vazhdimësi në bashkëpunim për çdo nevojë profesionale që ata do të kenë.
Dr.Ariel Çomo mori mendime të ndryshme nga profesionistët në lidhje me perfeksionimin e këtyre trajnimeve nisur nga eksperiencat dhe realiteti i tyre profesional.
Nga kjo nisëm përfituan edhe disa profesionistë që filluan menjëherë punë si terapistë në qendrën e hapur vitin e kaluar në Prishtinë dhe Prizren.
Fondacioni Fëmijët Shqiptar asistoi në formim profesional edhe ekipin e qendrës së Korçës.
Të çertifikuarit, përveç metodës ABA, njohin tashmë edhe Programin Edukativ Individual (IEP) dhe instrumentat vlerësues për të identifikuar dhe analizuar Sjelljet Problematike të paraqitura tek fëmijët.
