Këmbënguljes së opozitës shqiptare për të bokotuar zgjedhjet e 18 qershorit, nëse nuk krijohet një qeveri teknike, kryeministri Edi Rama i ka dhënë përgjigje përmes fjalëve të eurodeputetit Knut Fleckenstein, raportues për Shqipërinë në Parlamentin Evropian.
Përmes një statusi në Facebook, Rama ka publikuar të plotë deklaratën e Fleckenstein ku ai thotë se opozita nuk duhet të bojkotojë Parlamentin.
Statusi i Rames ne Facebook
KUSH GENJEN? (2)
Raportuesi për Shqipërinë në Parlamentin Evropian Knut Fleckenstein:
“E vetmja gjë për të cilën nuk jam dakord është bojkotimi i Parlamentit. Deputetët janë zgjedhur për të përfaqësuar qytetarët brenda institucioneve shtetërore. Ata duhet që të kthehen në vendin e tyre të punës. Gjatë vizitës sime të fundit në Tiranë, kam dëgjuar thirrjen e opozitës për një qeveri teknike.
Nuk e kuptoj se sa ky propozim do të kontribuojë në përmirësimin e situatës politike, ekonomike dhe sociale të Shqipërisë. Maqedonia është në një krizë të thellë politike që tashmë e ka dëmtuar rëndë ekonominë e vendit, reputacionin ndërkombëtar dhe perspektivën e saj për integrimin evropian.
Fatmirësisht, Shqipëria është në një situatë shumë ndryshe.
Zbatimi i reformës së gjyqësorit do ta çojë Shqipërinë përpara procesit për anëtarësimin në Bashkimin Evropian. Ata që përpiqen ta bllokojnë ose pengojnë këtë reformë efektive dhe të besueshme, bllokojnë nisjen e negociatave për futjen e Shqipërisë në BE.
Unë i bëj thirrje opozitës që të rinisë punën e saj në Parlament. I bej apel qeverisë, Parlamentit, mazhorancës dhe opozitës, të bashkëpunojnë ngushtësisht me OSBE-në dhe ODIHR, në mënyrë që të sigurojnë zgjedhje demokratike. Ato duhet të jenë të denja për një anëtar të ardhshëm të Bashkimit Evropian".
