Policia kërkon nga prokuroria të hetoje Partinë Demokratike në lidhje me deklaratat publike për protestën masive te thirrur në 7 maj, ditën kur zhvillohen zgjedhjet lokale në Bashkinë e Kavajës.
Sipas policisë, PD-ja dhe zyrtarët e saj ne deklarata kanë bërë “thirrje publike për veprime të dhunshme” dhe po tentojnë të “pengojnë subjektet gjatë zgjedhjeve”. Policia e Tiranës nis hetimet për Partinë Demokratike, duke dorëzuar materialin kallëzues në prokurori për dy akuza.
ABC News ka mësuar se policia e shtetit, ka referuar në prokurori një material kallzues për opozitën, në lidhje me zgjedhjet lokale më 7 maj në Bashkinë e Kavajës. Sipas këtij materiali referues, që po verifikohet nga prokurori Enklid Gjini, thuhet se Partia Demokratike nëpërmjet metodave të ndryshme dhe deklaratave publike po tenton të dëmtojë zgjedhjet lokale në Bashkinë e Kavajës. Në këto deklarata, që janë bashkangjitur materialit të policisë, zyrtarë të Partisë Demokratike kanë bërë thirrje publike për veprime të dhunshme ditën e zgjedhjeve në Kavajë. Për këto fakte, thuhet në kallëzim, policia ka kërkuar nisjen e hetimeve nga prokuroria për Partinë Demokratike për dy akuza, atë të “thirrjes publike për veprime të dhunshme” dhe “pengim të subjekteve zgjedhore” në bashkëpunim. Materialit të dorëzuar në prokurori, policia i ka bashkangjitur disa gazeta ditore, deklarata zyrtare të Partisë Demokratike dhe fjalime të kryetarit të opozitës Lulzim Basha. Por pavarësisht këtyre provave, policia është treguar e kujdesëshme duke mos akuzuar direkt me emër kreun e PD-së por subjektin partiak.
Opozita, prej disa ditësh, ka njoftuar bojkotin në zgjedhjet lokale në Bashkinë e Kavajës dhe ka bërë thirrje për një protestë kombëtare që do të mbahet në Kavajë, ditën e zgjedhjeve. Ata kanë deklaruar se nuk do të ketë zgjedhje pa opozitën, duke paralajmëruar kështu bllokimin e procesit zgjedhor për Bashkinë e Kavajës.
Nga ana tjetër, referuar kodit penal, dy akuzat ajo e “Thirrjes publike për veprime të dhunshme” dhe akuza e “pengimit të subjekteve zgjedhore” parashikohen si krim kundër rendit Kushtetuese dhe kanë një penalitet nga gjoba deri në tre vjet burg për individë të caktuar.
