Lëvizja Socialiste për Integrim (LSI) shprehu shqetësimin ndaj thirrjes së kryeministrit, Edi Rama për pjesëmarrjen e forcave të policisë në fushatën elektorale për zgjedhjet e 25 qershorit.
Kryeministri Edi Rama gjatë një takimi në Kuçovë ftoi forcat e policisë që pas lënies së detyrës, të angazhoheshin për mbledhjen e votave për Partinë Socialiste.
Por Luan Rama, nënkryetari i Lëvizjes Socialiste për Integrim, gjatë një deklarate për shtyp denoncoi këtë qëndrim të kryeministrit.
“Ky është një rast i paprecedentë dhe provokativ, sepse policia e shtetit e ka të ndaluar me ligj të marrë pjesë, gjatë apo pas orarit të punës në veprimtari politike. E ka të ndaluar rreptësishtë të mbledhë vota për ndonjë subjekt politik”, deklaroi ai.
Sipas Ramës, në Ligjin për policinë e shtetit në nenin 4, pika 2 thuhet shprehimisht se policia e shtetit është e depolitizuar ndërsa në nenin 5 , pika B theksohet paanshmëria politike.
“Gjatë apo pas orarit të punës, çdo punonjës policie e ka të ndalur rreptësishtë të jetë pjesë e aksionit politik të çdo force politike. Kryeministri fton policinë e shtetit të shkelë ligjin dhe urdhëron Policinë e Shtetit të vjedhë vota”, deklaroi nënkryetari i LSI-së, Rama.
