Posta e policisë së Velipojës nën drejtimin e shefit të ri të sapoemëruar Behar Hyka ka zhvilluar një aksion në plazhin e Velipojës.
Fillimisht janë kontrolluar të gjitha lokalet e natës duke bërë që muzika të mbyllet ne orën 23:00 për të siguruar qetësi për pushuesit e shumtë.
Shefi i ri Behar Hyka tha se është i vendosur për të mos lejuar që lokalet të tejkalojnë orën 23:00. Vetëm të premten dhe të shtunën muzika lejohet deri në orën 24:00. Më tej një postbllok me policinë rrugore, agjentet e antikrimit dhe grupin e FNSH kanë zhvilluar një kontroll për të gjitha mjetet që lëvizin nga Shkodra drejt Velipojës apo anasjelltas, raporton “Shkodra News”.
Shefi Hyka u shpreh se në fokus janë xhamat e errët që nuk lejohen, armëmbajtja pa leje, shpejtësia e tejkaluar apo edhe përdorimi i pijeve alkoolike.
Të gjithë shkelësit do të ndëshkohen në mënyrë që qytetarët dhe turistët të jenë sa më të sigurte. Këto kontrolle do të vijojnë gjatë gjithë sezonit turistik.