Situata me flakët mbetet ende problematike, ku në Qarkun e Dibrës, në bashkinë Mat, Klos dhe Bulqizë vijojnë të jenë aktive disa vatra zjarri.
Prefekti i Dibrës, Ardit Kaja bën të ditur se zjarri nuk rrezikon zonat e banuara. Për eliminimin e vatrave të zjarrit ai shtoi se janë angazhuar forcat zjarrfikëse, ato vullnetare, ndërsa në terrenet e vështira kanë ndërhyrë nga ajri helikopterë të kompanisë Viva.
Kaja shfaqi rezerva edhe ndaj angazhimit të pushtetit lokal, që sipas tij nuk ka infrastrukturën e duhur për ndërhyrje në situata të tilla.
Si pasojë e zjarreve janë shkaktuar dëme të konsiderueshme materiale. Me dhjetëra hektarë kullota, shkurre e pyje janë djegur, por fatmirësisht nuk janë regjistruar dëme në njerëz dhe bagëti. Kaja tha se Policia Dibër ka shpallur në kërkim një person që akuzohet për zjarrvënie të qëllimshme.
