Eksperti për ekonominë Bardh Sejdarasi është pro importit të mbetjeve.
Në studion e Ekopolitikë me gazetaren Aurora Sulce, ai tha se Shqipëria nuk është vendi i vetëm që miraton një ligj të tillë.
Sejdarasi: Të gjitha palët janë duke diskutuar për një çështje që nuk duhet ti kushtojë kaq shumë vëmendje, pasi është një çështje që ka modele. Nuk është Shqipëria vendi i parë që kërkon të bëjë riciklikim e mbetjeve. Nuk është Shqipëria vendi i parë që kërkon të azhornojë një ligj që njihet në BE. Nuk është Shqipëria vendi i parë që kërkon të plotësojë një protokoll që e kanë vendet e BE. Nuk është Shqipëria vendi i parë ku një grup biznesesh që kanë investuar kapitalet e tyre janë pjesë e një industrie ricikluese që kërkon lëndë të parë. Kjo ndodh në Gjermani, Itali, Slloveni dhe në shumë vende të tjerë.
Nuk ka gjë shqetësuese?
Sejdarasi: Absolutisht jo. Gjermania është vendi i parë që përpunon mbetjet, madje mbetjet e rrezikshme. Shqipëria ka pasur specifikat e saj që lidheshin me administrimin.