Dimri mbërriti menjëherë pas ditëve me diell, pothuajse verore. Ulja e menjëhershme e temperaturave ka sjellë reshje shiu në të gjithë vendin, veçanërisht në veri dhe veri-lindje ku nisën edhe reshje dëbore.
Në zonat e thella trashësia e borës shkoi deri në 25 centimetra, ndërsa në Rrugën e Kombit deri në 10 centimetra. Pjesa më e vështirë e rrugës është në zonën mes fushës së Dukagjinit dhe tunelit të Kalimashit.
Reshjet e borës nisën menjëherë duke u bërë shkak edhe për aksidente të lehta, pa të lënduar. Policia rrugore nisi kontrollin dhe këshillon drejtuesit e mjeteve të ulin shpejtësinë për shkak të lagështirës në rrugë.
Ndërsa kater mjete borëpastruese dolën në rruge duke hequr borën dhe hedhur kripë. Kalimi në Rrugën e Kombit është i hapur, por më problematike është situata në rrugën Kukës-Shishtavec, Kukës-Peshkopi, si edhe rrugët rurale drejt njësive Novosej, Borje, Topojan, Bushtricë dhe Grykëçaj.
Reshje bore ka edhe në zonat e thella malore të Hasit e Tropojës. Sinoptikanët parashikojnë përmirësim të motit sot dhe nesër, ndërsa policia rrugore kërkon kujdes gjatë lëvizjes në rrugë në zonat me reshje shiu dhe dëbore.