Prokuroria për Krime të Rënda në Shqipëri prej disa muajsh ka qenë duke bërë hetime për një grup të lidhur me Habilajt, që merrej me kultivimin dhe trafikimin e drogës në Vlorës.
Kështu, mbrëmjen e së mërkurës ata kanë njoftuar në moment të fundit policinë, për të ndërhyrë në zonën e Babicës në Vlorë, aty ku dyshohej se fshihej lëndë narkotike. Në një njoftim zyrtar, Prokuroria për Krime të Rënda thotë se aksioni u finalizua me zbulimin e një sasie të konsiderueshme lëndë narkotike.
“Në baze të hetimeve të Prokurorisë, rezulton se lënda narkotike është kultivuar, përpunuar, magazinuar dhe është bërë gati për trafik nga persona, pjesë e grupit kriminal të njohur si Habilaj.
Ndërkohë, hetimet po zhvillohen me intensitet të lartë, për zbulimin e të gjithë personave te përfshirë në grupin kriminal. Hetimi është zhvilluar në bashkëpunim me autoritetet ndërkombëtare dhe me shërbimet inteligjente”, thuhet në njoftimin e Prokurorisë.
Droga u gjet në një vilë luksoze në pronësi të Armand Kocerrit, në një dhomë të kthyer në magazinë për vendosjen e dhjetëra thasëve të mbushur me kanabis. Vila ishte në një zonë të veçuar nga banesat e tjera në fshatin e Babicës, me rrugë të pakalueshme nga makina të vogla.
Në momentin e ndërhyrjes nga polciai ën banesë ka pasur disa persona të cilët janë shoqëruar nga policia, emri i të cilëve ende nuk bëhet i ditur.
Dy ditë më parë në zyrën e prokurorit të Përgjithshëm Adriatik Llalla mbërriti kreu i Shërbimit Informativ Shtetëror Visho Ajazi e temë ishte pikërisht dosja Habilaj e kopsitur nga prokuroria italiane. Mosi Habilaj është arrestuar në Itali si kreu i bandës së trafikut ndërkombëtar të drogës nga Shqipëria në Itali. Ndërsa në përgjimet që i jaën bërë bandës ndër vite, dalin një sërë emrash zyrtarësh në polici dhe jo vetëm, por edhe emri i ish-ministrit të Brendshëm Saimir Tahiri.
