Ajo u shfaq sot në Komisionin e Mandateve e prerë dhe e vendosur dhe duket se kjo nuk është hera e parë që Elisabeta Imeraj përballet me çështje të vështira. Prokurorja e krimeve të rënda, ndër të paktat gra në këtë institucion, spikati veçanërisht në diskutimin e sotëm mbi çështjen Tahiri.
Por cila është gruaja e fortë nga Tropoja, nëna e dy fëmijëve dhe prokurorja e çështjeve të mëdha, mes të cilave ajo e Shullazit, apo e 9 imamamëve të akuzuar për terrorizëm, për të cilët kërkoi 126 vjet burg.
Çfarë ndodhi sot në Komisionin e Mandateve:
Hysi: E kam me prokuroren që ka mbrojtur doktoraturën, a do pranoni ju që në bazë të thënieve në gazetë, ende pa e lexuar materialin, të krijoni bindjen e mjaftueshme?
Imeraj: Nuk po e marr pyetjen si intimiduese se në fakt më keni dhënë mësim. Nuk kemi ardhur këtu me dy mendje, as të dyzuar. Prokuroria ngre akuzë, është gjykata që del me vendim përfundimtar. Kjo nuk lidhet me atë çfarë unë mendoj por me atë çfarë mendon i gjithë grupi hetimor.
Nuk është pak që të kapen 3.5 tonë lëndë narkotike në territorin italian, as pak 4 tonë në territorin tonë.
(Ka ndërhyrje nga anëtarët, zhurmë)
Ruçi: Deputet të lutem mos i ndërhy prokurores! As palës mbrojtëse. Imeraj: Lënda narkotike që është sekuestruar pa i hyrë detajeve të tjera për kanabizimin e gjithë territorit të Shqipërisë, i qëndrojmë kërkesës së bërë.
DEBATI ME TAHIRIN:
(Është nxehur situata në mbledhjen në Këshillin e Mandateve pas marrjes së fjalës nga ana e deputetit Saimir Tahiri. Ai është kapur disa herë me prokurorët duke u përpjekur që të ndikojë te ata në aspektin psikologjik.)
Tahiri: Nëqoftëse unë kam ardhur në Prokurorinë e Krimeve të Rënda për deklarata publike ku implikohesha unë, makina ime dhe shtetasit Habilaj, për cilat arsye ju jeni penguar të nisni hetim?!
Alibeaj: Ajo që po bën zotëri janë komente dhe deklarata. Do ta ketë kohën me pas, pa merak për këtë punë! Të krijojë emocione intimidimi për prokurorët atje…
Imeraj: Fakti që pse nuk keni hetuar atëherë dhe jo tani, ka hetuar atëherë prokuroria dhe ka konkluduar, heton tani dhe konkludon. Është çështje veprimesh.
Tahiri: Fakti që unë kam ardhur vetë të kërkoj hetim, e hedh poshtë deklaratën tuaj?
Imeraj: Ne nuk operojmë me deklarata!
Halimi: Nuk mund t’i bëjë ai prokurores pyetje, ç’është ky muhabet, pyetje politike prokurorëve?! Kjo është detyra jonë, të dëgjojmë njërin-tjetrin, ju me sa shoh e keni marrë vendimin. Po mirë, po procedurën do ta zbatojmë?!
Ruçi: Mos jep paragjykim as për prokurorinë as për deputetin. Deputeti ka të drejtën të sqarojë 2-3-5 gjëra. Ju lutem z.Tahiri pyetje të karakterit teknik i bëni dhe të fillojmë menjëherë shpjegimet tuaja!
Hajdarmataj: Z.kryetar për procedurë! Jam i mendimit që po gjykojmë në një terren kushtetues. Gjykimi juaj po mbron deputetin, të njëjtat standarde duhet të na krijohen edhe neve!
Pak kohë më parë, Imeraj ka dhënë një intervistë për revisten “Elite”, ku përveç jetës profesionale tregon edhe jetën familjare.
Një prokurore femër tek Krimet e Rënda sa e vështirë është për një femër të ushtrojë këtë funksion? Mund të më thoni si ka nisur rrugëtimi dhe si ka qenë përfshirja juaj në organet e drejtësisë?
Kam filluar detyrën time si prokurore në Prokurorinë e Rrethit Gjyqësor Shkodër në vitin 2004, dhe më pas në Prokurorinë pranë Gjykatës së Shkallës së Parë për Krime të Rënda Tiranë, detyrë në të cilën jam dhe aktualisht. Me mbarimin e shkollës së magjistraturës për profilin prokuror në vitin 2004 nis dhe rrugëtimi im në organet e drejtësisë.
Cili është formimi juaj akademik dhe përse zgjodhët pikërisht fushën e drejtësisë?
Po e nis përgjigjen nga arsyet e zgjedhjes së fushës së drejtësisë të cilat përkojnë me dëshirën time të lindur që në adoleshencë për të qenë prokurore. Shkollimi në Fakultetin e Drejtësisë, Universiteti i Tiranës dhe më pas ndjekja e Shkollës së Magjistraturës bënë realitet dëshirën time për tu bërë prokurore. Ndaj të qënurit prokurore, për mua nuk lidhet vetëm me plotësimin e një elementi ‘pasja e një pune’, por përbën ushtrimin e një detyre me shumë dëshirë dhe pasion.
Sa e pavarur ndiheni ju si prokurore në vendimet tuaja? Cila është ambicja juaj më e madhe lidhur me fushën ku ju aderoni?
Nuk dua të lidh vendimarrjen si prokuror me të qënurit mashkull apo femër. Shoqëria jonë duhet të mundohet t’i kalojë këto ndarje gjinore, pasi vendimet merren si të tilla, si një prokuror pavarësisht se cilës gjini i përket. Pa hyrë në detaje ligjore të cilat rregullojnë vendimarrjen e një prokurori, do të doja të theksoja se e rëndësishme është të jesh i drejtë dhe objektiv, të dish të argumentosh mendimin tënd dhe ta përcjellësh siç duhet atë. Dëshirat dhe ambicjet lidhen me sistemin e karrierës në prokurori dhe mbetet për të pritur. Bëj pjesë në grupin e njerëzve me natyrë kërkuese si ndaj vetes ashtu dhe ndaj gjërave me të cilat përfshihem. Jam e bindur që me punë dhe përpjekje mundet të arrihet çdo gjë. E kam mbaruar fakultetin e Drejtësisë në vitin 2001 dhe pavarësisht nga kjo, vazhdoj të mos shkëputem nga dëshira e përmirësimit të dijeve dhe zhvillimit akademik. Me mbarimin e Shkollës së Magjistraturës në vitin 2004, kam ndjekur studimet Master nga 2006 deri në vitin 2008. Zotëroj titullin profesoreshë e asocuar dhe Dr e shkencave Juridike, dhe në rang të ambicjeve në këtë drejtim, duhen bërë studimet përkatëse për titullin professor.
Shpeshherë flitet se politika ndërhyn shumë në vendmarrjet e drejtësisë…?
Vendi ynë është një vend i vogël, dhe më e keqja është se të gjithë marrin përsipër të flasin për çdo gjë. Nuk dua të shpreh opinione nëse ndodh apo nuk ndodh një gjë e tillë, por duhet të them se ka ardhur koha ku secili të merret me punën që i takon dhe që mbi të gjitha të merret me punën për të cilën ka njohuritë e duhura për ta bërë.
Mund të më thoni si ndiheni kur vendosni pas hekurave individë të ndryshëm?
Detyra e prokurorit është të ushtrojë ndjekjen penale e cila mundet të konkludohet edhe me arrestimin e personave të hetuar. Vënia pas hekurave e personave të hetuar nuk mund të përjetohet as si kënaqësi dhe as si keqardhje.
Por ama, pasja e një hetimi të suksesshëm të jep normalisht kënaqësi.
Në drejtësi flitet se ka shumë problem, shumë gjëra që nuk shkojnë, përmendim këtu qoftë dhe emërimet pa meritokraci, ju si mendoni?
Si për çdo gjë tjetër edhe në këtë rast ka nevojë për përmirësimet e duhura. Meritokracia nuk është ndonjë tipar i spikatur që shoqëria jonë e vlerëson më së miri, megjithatë personave që iu është dhënë rasti për ecjen në karrierë kanë pasur shansin të tregojnë vlerat e tyre ose jo. Vlerësimi më i mirë jepet nga koha dhe rezultati. Cili është vendimi juaj që ju ka mbetur në mendje më i vështiri si proces? Nuk dua të specifikoj ndonjë vendim apo ndonjë proces në mënyrë të veçantë. Ju përkas atyre prokurorëve që i shohin çështjen e tyre në trajtim të barabartë. Por e parë në një prizëm të përgjithshëm, ato çfarë më kanë mbetur në mendje si procese janë ato procese në të cilat kemi pasur vështirësi me procesin e të provuarit për arsye të ndryshme të pavarura nga hetimi, dhe që në fund kemi arritur të kemi një rezultat pozitiv.
Është folur për krijimin dhe ngritjen e një prokurorie të posaçme më e besueshme cili është opinioni juaj si prokurore…?
Puna në prokurori është një punë interesante. Unë si prokurore jam dakord me çdo lloj risie që sjell përmirësim, por do të doja të nënvizoj diçka, punoj prej shumë vitesh në Prokurorinë pranë Gjykatës së Shkallës së Parë për Krime të Rënda, ashtu si shumë kolegë të mi. Kjo prokurori në përgjithësi ka dëshmuar histori suksesi që nga momenti i krijimit të saj e deri më sot. Nuk më vjen mirë që të themi se diçka që pritet të krijohet mundet të jetë më e besueshme, as dhe më e mirë. Jemi të gjithë dakord që sistemi të pësojë reformimin e duhur, por duhet të bëhet mbi baza të shëndosha. Në asnjë rast diçka e krijuar mbi diçka që prishet nuk mundet të jetë më e mirë. Dua të bëj një paralelizëm të vogël, me përmbysjen e sistemit komunist shoqëria jonë u tregua e dhunshme në drejtim edhe të objekteve që sistemi i mëparshëm kishte krijuar, a thua që uzinat apo fabrikat e shkatërruara nuk na përkisinin neve. Përmirësimi vjen me gjetjen e shkakut që shkakton dëmin dhe luftimin e shkakut dhe jo me zëvëndësimin e strukturave apo të personave.
